USA ka 86-anyos nga lolo namatay human nabitik sa pisi sa iyang baboy ug natumba, apan ang iyang ulo napantok sa lansang nga nagtaroy sa kahoy.
Nahitabo kini sa Purok Tambis, Barangay Paculob, lungsod sa Dumanjug, alas 7:15 sa buntag, Martes, Marso 15.
Ang biktima giilang mao si Inocencio Montemayor Sacan, minyo, mag-uuma, nagpuyo sa nahisgutang lugar.
Si Police Master Sgt. Oscar Badilla sa Dumanjug Police Station nagkanayon nga ang apo sa biktima nga si Jessica Cueva maoy nipahibawo sa Police Station sa alas 2:45 sa hapon sa Martes nga namatay ang iyang apuhan.
Matod niini, ang iyang apohan nagdakop sa binuhing baboy nga nakagawas sa tangkal ug dihang gihiktan og pisi apan kalit nga nikisikisi ang baboy hinungdan nga nabitik ang iyang tiil, nawad-an sa balanse ug natumba.
Pagkatumba ni Sacan, ang iyang ulo nitugpa tumong sa lansang nga diha sa kahoy.
Nawad-an sa panimuot ang biktima, gidali og tabang ug gihatagan og first aid, matod ni Badilla base sa sulti sa apo.
“Wa sila magdahom nga fatal to ang nahiaguman sa biktima. Nagtuo lang sila nga gamay ra ang samad. Wa na dalha sa tambalanan, namatay hinuon,” dugang ni Badilla.
Nagkanayon si Badilla nga edaran na si Sacan unya dako ang baboy busa nalupig sa kusog sa paglugnot sa hayop ug naapil og kagapos sa pisi.
Ang pamilya nipadayag nga lagsik pa si Sacan bisan sa iyang pangidaron.