Ig-agaw ni ‘Yawa’ nasikop sa drug bust

(Hulagway ni Benjie B. Talisic)
(Hulagway ni Benjie B. Talisic)

(UPDATED) Ig-agaw sa kanhi inilang druglord nga nagbase sa isla sa Banakon, lungsod sa Getafe, lalawigan sa Bohol nasikop pasado alas 10:00 sa gabii sa Miyerkules, Marso 16, sa Sityo Black Cat sa Barangay Duljo Fatima, siyudad sa Sugbo.

Nakuhaan og duha ka kilo ug 75 gramos nga mobalor og P14.1 milyunes base sa street drug price (SDP).

Si Mark Secretaria Duaban, 42, sa sityo Riverside sa Duljo Fatima, nasikop sa anti illegal drug operation nga gilusad sa mga operatiba sa Police Drug Enforcement Unit (RPDEU) 7.

Giingong gigamit nga drug courier usa ka batang lalaki.

Si Duaban ig-agaw sa inilang drug lord kaniadto nga si anhing Rowen “Yawa” Secretaria nga naglihok sa Bohol ug Sugbo ug nailhan usab nga sakop ni anhing Jeffrey 'Jaguar' Diaz.

Ang grupo ni Police Lieutenant Bonifacio Tañola, team leader sa RPDEU-7, nilusad sa drug-bust ug malampuson nga nadakpan si Duaban.

Samtang si Police Lieutenant Colonel Ronnie Failoga, pangulo sa RPDEU-7, atol sa interview sa Superbalita Cebu, nibutyag nga usa ka buwan ang gigugol sa iyang mga sakop hangtud nga natultolan ug gironda si Duaban.

“Actually may mga huli kami na ang pangalan talaga niya ang nababanggit kaya tinukoy namin ang kanyang tinitirhan hanggang sa umabot sa pinaplano ang pag buy-bust sa kanya,” matod ni Failoga.

Dugang ni Failoga nga sa ilang nahibaw-an, subay sa pag-angkon ni Duaban, usa ka piniriso nga nagngalan og ‘Jongkol’ maoy iyang agawon sa illegal drugs.

Tibuok Metro Cebu maoy hagbunganan sa drugas ni Duaban apil na ang mga kasikbit nga kalungsoran.

Ang dinakpan, sa iyang habig sa interview sa Superbalita Cebu, niangkon nga tawag gikan sa selpon ang iyang nadawat aron dawaton ang shabu gikan sa usa ka batang lalaki nga nag edad og 9 anyos nga maoy gihimong courier sa drugas.

Hinuon, wa maabti ug wa makompirmar sa kapulisan ang pangangkon ni Duaban.

Si Duaban niangkon usab nga nahimo usab siya nga sinaligan sa laing druglord nga si anhing Crisostomo “Tata Negro” Llaguno kaniadto sulod sa tulo ka tuig ug napriso siya sa 2016.

Gikan sa iyang paggawas sa prisohan niadtong 2019, nilarga siya sa Davao, apan wala siya kahinumdom kon unsa nga lungsod ug pila usab ka mga tuig siya nagpundo didto hangtod nga nibalik siya sa Sugbo niining bag-ohay lang.

Matod ni Duaban nga nahadlok siya nga tirahan sa mga bataan ni anhing Tata Negro kay duna siyay utang nga P100,000 sa drugas nga iyang nakuha kaniadto.

Si Llaguno namatay niadtong 2010 samtang siya nangampanya sa iyang pagdagan nga independente sa pagka konsehal sa Cebu City.

Samtang, tawag ni Duaban sa ilang lugar sa Duljo Fatima kay 'pastor' human nga siya nagtukod sa iyang relihiyon nga Maayong Balita, kansang mga miyembro iyang pamilya lang.

“Didto ko sa sulod, Sir, gipadamgo ko sa Ginoo nga iya kong gipukaw ug nag-istorya ming duha ug iya ko giingnan nga pagtukod og relihiyon ug mao kining ‘Maayong Balita’,” matod ni Duaban. (BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph