Sugilanon: Ang bakos ni Papa

By: HONEY MAY B. TECLING

Cebu City


UNYANG hapon akong inspeksyunon ang inyong mga libro kon nakoberan na ba kini og bag-ong plastic cover,” matod sa among magtutudlo sa Grade 5. “Ug bahin sa inyong Mutual Aid nga bayranan nga singkwenta pesos, ingna inyong ginikanan nga karong hapon na kutob ang bayad.”

“Duna ba kahay kuwarta sila Mama ug Papa?” pangutana ko sa akong kaugalingon.

Dihang namuhi na kami sa klase pagkaudto, nagdali ko nga nipauli. Kinahanglan makauli dayon ko kay mangayo pa baya ko og kuwarta nilang Mama ug Papa para ipalit og plastic cover para sa akong mga libro ug para pod ibayad sa Mutual Aid. Pag-abot ko sa amoa, nakita ko si Papa nga naglingkod sa gawas. Giduol nako si Papa ug mi-amen sa iyang kamot.

“Hala, sulod na didto sa kusina aron mokaon na sa imong paniudto,” matod ni Papa.

Ako dayong gihubo ang akong sapatos ug ang akong school bag akong gibutang sa lingkuranan nga diha sa kilid sa pultahan. Nipaingon ko sa kusina. Nakita ko si Mama nga nagsukad og kan-on. Nikuha ko og lingkuranan gikan sa ilalom sa lamesa ug nilingkod.

“O, Honey, kumusta ang klase?” nangutana si Mama.

“Okey ra man, Ma,” tubag ko. Diha pa untay buot nakong isulti, apan nasanta ko sa pagsulti kay mikalit pagtingog si Papa.

“Unya na nang tabi! Kaon na diha kay mauwahi ka sa imong klase!,” ni Papa.

Gituman ko ang mando sa akong amahan. Nagdali kog kaon. Pagkahuman nakog inom og tubig, akong giduol sila si Mama ug Papa nga nanglingkod sa sopa sa sala.

“Ma, Pa, naa mi bayranan sa eskuylahan. Kadtong Mutual Aid nga singkwenta pesos. Ingon si Ma’m, kutob na lang karong hapon ang pagbayad. Nya, kinahanglan sad kuno nga koberan na og plastik ang among libro kay inspekyunon ni Ma’m.”

Nakita ko nga nausab ang nawong ni Papa. Maora kini og nasuko.

“Ingna imong maestra nga sa sunod semana na ikaw mobayad kay wala pa koy sapi karon diri!” Isog nga namulong si Papa nga mitutok kanako.

“Apan, Pa, karon man ang giingon ni Ma’am. Makasab-an ko ni Ma’am!” may kahadlok nga gitubag ko ang akong amahan.

“Ingna lang lagi nga sunod semana na! Kanang plastic cover sunod semana lang sad na!,” masuk-anong misulti si Papa nga nidako ang tingog.

Nahadlok ko sa akong amahan. Nisulod ko sa akong kuwarto. Naghubo ko sa akong uniporme ug nag-ilis. Nakadisisyon ko nga dili na lang ko mobalik sa eskuylahan karon. “Honey! Honey!” sangpit ni Papa samtang nanuktok sa pultahan sa akong kuwarto.

Akong giablihan ang pultahan.

“Nganong wa na man ka magsul-ob sa imong uniporme?” isog nga pangutana ni Papa.

“Mo-absent lang ko, Pa. Mauwaw ko sa akong mga klasmeyt. Ug mahadlok sab ko ni Ma’am. Mauwaw ko kay wa koy ikabayad sa Mutual Aid, Pa.” Naghilak ko nga nitubag sa akong amahan.

Unya sa kalit nakasiyagit ako sa kasakit nga akong nabatyagan. Gibunalan ako ni papa sa iyang bakos. Naigo ko sa batiis. Wala man ko kabantay nga nagdala diay siya og bakos dihang nanuktok siya. Pak! Pak!Pak! Nasundan pa kini og tulo ka lagapak sa akong paa.

“Agay, Pa! Huhuhuhuhuhu! Husto na intawon, Pa!” pakiluoy ko sa akong amahan.

“Para kana rang problemaha, dili na ka mo-eskuyla? Kagamay ra ana! Dili ka makaatubang ana? Unsaon nimo pag-atubang sa umaabot pa nga dagkong problema kon kana nga gamay ra, dili ka kaatubang?” yawyaw ni Papa. “Pag-ilis! Balik sa eskuylahan!”

Nibarog ko bisan og sakit kaayo ang akong paa. Nagdali kong gisul-ob ang akong uniporme. Gipahiran ko ang mga luha sa akong mga aping ug paspas nga nilakaw paingon sa eskuylahan. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph