Namatay sud sa pribadong tambalanan sa alas 3:14 sa hapon, Huwebes, Marso 17, ang beterano ug hard-hitting nga maglilindog sa Superbalita, SunStar Cebu ug radyo nga si Pablito 'Bobby' Nalzaro. Siya 58 anyos.
Si Kit Matus, assistant station manager sa dySS, diin si Nalzaro maoy manager, niingon nga nasakit og pneumonia ang magsisibya ug columnist ning mantalaan.
Matod niya nga sugod niadtong Dominggo, Marso 13, 'gi-intubate' na si Nalzaro kay naglisod na sa pagginhawa bisan gi-oxygen tungod sa pneumonia.
Naospital si Nalzaro sugod niadtong Enero 29 human nanghupong ang iyang usa ka tiil tungod sa komplikasyon sa diabetes.
Matod ni Matus nga mogawasay na unta si Nalzaro apan nakaplagan sa laing exam sa Chong Hua Hospital nga duna siyay pneumonia.
Ikaduha na kadto nga pagkaospital ni Nalzaro kay niadtong Disyembre 24, 2021 gidala siya sa tambalanan human nakasinati og mild stroke.
Mga usa ka semana kapin ang nakalabay, nakagawas ra siya ug sa balay siya nipailawom og therapy.
Nagpa-check-up ra unta siya niadtong Enero 29 human sa paghupong sa iyang tiil apan gitambagan siya sa doktor sa pagpa-admit.
Si Nalzaro mao usay anchor sa GMA 7 Balitang Bisdak regional news.
Niadtong Pebrero 1, 2022 nipahibawo siya sa editorial dept. sa Superbalita Cebu nga temporaryo siyang moundang sa pagsuwat sa iyang lindog.
“Pass sa ko sa column. Nagsakit kog balik,” mabasa sa text ni Nalzaro.