Mga duwa karon
3:00 pm- San Miguel batok Meralco
6:00 pm- Magnolia batok Phoenix
Mosuway pagsubay sa shortcut nga agianan paingon sa semis ang Magnolia Ang Pambansang Manok Hotshots ug Meralco Bolts sa ilang pagpakigbatok og lainlaing kontra karong adlawa, Marso 18, 2022 sa Philippine Basketball Association (PBA) Governor’s Cup sa Smart Araneta Coliseum.
Ang No. 1 seeded Hotshots makigsangka sa No. 8 Phoenix Super LPG Fuel Masters sa main game karong alas 6:00 sa gabii samtang ang No. 4 Bolts makigbatok sa No. 5 San Miguel Beermen sa premirong duwa sugod karong alas 3:00 sa hapon.
Isip benepisyo sa ilang pag-angkon sa mas taas nga puwesto human sa elimination round, ang Hotshots ug Bolts naggunit og twice-to-beat nga bintaha ning maong mga engkuwentro.
Apan dili angay molugak bisan gamay ang Hotshots ug Bolts gumikan kay pulos determinado nga mopakgang sa ilang intensyon ang ilang tagsa-tagsa ka kontra.
“Do-or-die para sa amin ito,” matod ni Beermen coach Leo Austria. “Ang inaasahan sa amin ng mga tao is to at least get into the next round kaya kailangan talaga all-out kami dito.”
Sa ilang engkuwentro sa elimination round niadtong Marso 5, 2022, gipanghubog sa Beermen ang Bolts, 115-110, nga seguradong nakahatag og psychological advantage sa 1989 Grandslam winner.
Ang Bolts ni coach Norman Black nipadayag sa ilang kaandam nga bawsan ang Beermen ning higayuna.
Sa laing panagparang, dili ikalimod nga grabe ka taas sa morale sa Hotshots human nila napatigbabawan ang elimination round dala ang 9-2 nga rekord.
Hinuon, seguradong dili basta-basta magpalupig ang Fuel Masters ug seguradong ipagawas nila ang ilang tanang makaya makaposte lang og surpresang kadaugan.