NAWAD-AN og preno ang usa kasakyanan hinungdan nga midaro sa kasugat nga motorsiklo ang gikamatyan sa usa ka lalaki atol sa natigayong disgrasya alas 9:45 sa buntag, Marso 16, 2022, didto sa Sitio Lanitom, Barangay Suawan, Marilog District, Davao City.

Dead on the spot si Retada Rhandulf, hamtong ang pangedaron ug residente sa Mangagoy, Bislig City, usa sa mga nisakay sa usa ka Isuzu dropside nga nagkarga og sinakong kalabasa.

Nasayran nga ang Isuzu padung sa Davao City aron ihatod ang mga kalabasa, dihang nawad-an kini og preno sa likuong bahin sa Sitio Lanitom, hinungdan nga gidaro niini ang kasugat nga motorsiklo.

Sa kakusog sa impak, nangalagpot ang sakay sa Isuzu, diin si Rhandulf nasulod sa kanal sa highway ug namatay, samtang ang kaubanan niining duha lakip ang drayber nakahiagom og grabeng samad sa kalawasan.

Daghan sab og samad sa kalawasan ang nahiagoman sa drayber sa motorsiklo ug ang angkas niini.

Ang upat ka mga naangol anaa sa Southern Philippines Medical Center samtang ang usa nga namatay anaa sa Angel Funeral Parlor sa Calinan, Siyudad sa Davao.

Padayon ang gihimong imbestigasyon sa Traffic Section sa Marilog Police labot sa disgrasya.