TANGGONG karon sa selda sa Toril Police Station ang usa ka retiradong magtutudlo human nakuhaan og pusil sud sa iyang sakyanan samtang pasulod sa Task Force (TF)-Davao Sirawan Base, Barangay Sirawan, Toril District, Davao City Marso 16, 2022.
Ang dinakpan nailhang si Akmad Mohammad (bansagon gitago), 62, residente sa Barangay Tamnag, Lutayan, Sultan Kudarat.
Sumala sa Toril Police Station nga nagpahigayon og checkpoint ang mga personahe sa Toril Police Station, kauban ang TF-Davao diin ang dinakpan sakay sa iyang Toyota Fortuner, kolor itom.
Atol sa plain view, nakita sa awtoridad nga misiwil ang kadudahang butang nga usa ka pusil sa sling bag tupad sa suspek, hinungdan nga gipaablihan kini.
Usa ka homemade kalibre .45 nga pistola nga dunay magazine nga dunay pito sa buhing bala ang nakita sa awtoridad.
Gilayong gikustodiya ang dinakpan kinsa pasakaan og kasong pagsupak sa Republic Act 10591 kun Illegal Possession of Firearms and Ammunition ug Batasang Pambansa 881 kun Omnibus Election Code.