MIDANGOP sa kapulisan sa Talomo Police Station ang usa ka 86-anyos nga dalagang ulay human siya alegasyong gibaklad sa iyang silingan nga 70-anyos alas 11 sa gabii niadtong Marso 17, 2022 sa usa ka purok sa Barangay Matina Aplaya, Davao City.

Sa impormasyon nga nahipos sa Superbalita Davao gikan sa presinto 3, ang edarang babaye nga si Gilda nagsaysay nga sa dihang naghigda na siya ug naglingasa kay wala katulog sa kainit sa iyang lawak, iyang nasiplatan sa buho ang mata sa tawo.

Dali dayon niyang giablihan ang bintana ug gitan-aw ug didto iyang naapsan ang usa ka Rogelio, ang 70-anyos nga biyudo.

Perte suma pang dagan ni Rogelio, apan gidimalas kay nabulasot sa kanal, hinungdan nga wa kini kasibat ug iyang gikompronta og istorya.

Naguol si Gilda gumikan niadtong tungora, nipis kaayo ang iyang sinina ug wa siya'y panty.

Hinuon, nakubsan iyang kaguol human walay selpon si Rogelio nga maoy gamiton unya sa pagkuha og video kaniya.

Nangayo hinuon og pasaylo si Rogelio kang Gilda, apan mag-abot gihapon sila sa barangay hall sa Matina Aplaya subay sa rekomendasyon sa police desk officer aron sila mahusay.