TULO na ka tuig ang milabay sukad nahuman nako akong katapusang chemotherapy pagbatok sa breast cancer unya kaluoy sa Dios inubanan sa tim-os nga pag-ampo ug pangaliya, insaktong tambal, igong pahuway og masustansiyang pagkaon, hinay-hinay na nga nabalik ang akong kusog ug kahimsog.
Daghan ko og nakat-unan sa akong naagian ug personal nga kasinatian bagbatok ini maong karong adlawa akong hisgutan ang mga pagkaon ug ilinon nga angay likayan kay kini mga nag-unang rason nganong masakit og cancer unya ang pagpatambal sarang mahala.
Matod sa ‘Halamang Gamot’ nga basahon kining mosunod nga pagkaon og ilimnon maoy maka-ingon sa sakit nga cancer.
Ang kanunay nga pagkaon og processed foods sama sa hotdog, bacon, sausage, ham, chorizo, tocino og uban pang mga processed meat apil mga de lata sama sa corned beef kay daghan kini og carcinogens nga maoy hinungdan a cancer.
Ang pagsegi og kaon ini makapataas sa porsento sa colorectal, bladder, breast ug stomach cancer unya maka-ingon sab sa sakit nga Type 2 diabetes.
Sunod ang pagsegi og inom og softdrinks nga dunay taas nga sugar content. Ang gidaghanon sa kamay nga mosulod sa atong lawas maoy nagpakaon ug nagpabuhi og samot sa cancer cells maong mosipa hinuon kini og tubo ug daghan.
Ikatulo kining French Fries. Kining patatas dunay acrylamide, usa ka klase nga kemikal nga maoy maka-ingon sa cancer sa tawo labi na kung giluto kini og dugay sa taas nga temperatura o gisulod sa fridge.
Sunod kining mga karne nga sinugba ug pinirito (baboy, manok, o baka) kay naa sab kini carcinogen nga nakuha sa pagprocess ini. Ayaw adlaw-adlawa ang pagkaon unya kung di gyod malikayan, parisan kini og daghang utanon.
Sunod ang ilimnong makahubog. Makadaot kini sa DNA sa atong lawas tungod sa kemical nga gitawag og acetaldehyde. Kung maguba na gani atong DNA sa lawas, magsugod na sab dayon og tubo ang tumor ug cancer sa baba, tutunlan, tila-ok, larynx , esophagus, colon, liver, breast og rectum.