GIHULAGWAY sa kapulisan nga notadong isnatser sa Metro Cebu nadakpan sa operasyon sa Drug Enforcement Unit (DEU) sa Talisay City Police Station, pasado alas 10:00 sa gabii, Huwebes, Marso 17, 2022.
Nasikop sa DEU sa Talisay si Ruel Caparida Deiparine nga mas naila sa alyas nga ‘Pawikan’, 36, molupyo sa Sitio Mananga 2, Barangay Tabunok, Talisay City.
Nadakpan uban niya nga giila usab sa kapulisan nga laing notadong isnatser nga si Rodolfo Magali Mendoza, alyas ‘Dondon’, 48, lumolupyo sa nahisgutang barangay.
Ang drug bust gipangulohan ni Police Lieutenant Elwood Ebona sa DEU Talisay City Police Station.
Si Police Lieutenant Colonel Randy Caballes, hepe sa Talisay City Police Station, nibutyag nga nasakmitan sila si Deiparine ug Mendoza og shabu nga motimbang og 15 gramos nga dunay street drug price nga P102,000.
Nakuha usab sa mga operatiba atol sa pagpangronda ang usa ka .357 caliber revolver nga dunay upat ka mga bala.
Sa kasayuran nga gihatag ni Caballes nga si Deiparine nalambigit sa pagpangawat sukad sa edad nga 25 anyos samtang, si Mendoza nagsugod sa edad nga 35 anyos.
Kasagaran sa mga biktima sa duha kon mangawat o manglabni kadtong mga tiguwang nga babaye. Dugang sa kapulisan, ang duha naglihok sa ilang pagpangawat sa dakbayan sa Sugbo, Lapu-Lapu, Mandaue ug karon nagtago-tago sa Talisay hangtud nga ilang nahibaloan nga nisulod na usab sa pagpamaligya og gidiling druga ug ilang gilusad ang operasyon.
Dugang ni Caballes nga si Deiparine nadakpan na nila niadtong 2018 sa kaso nga snatching sa dakbayan sa Sugbo.