Pasayloa ug tugoti nga ako unang gahinan og igong luna ning atong lindog ang akong pahasubo sa kinalit nga pagtaliwan sa akong kauban sa industriya ug nahimong usa sa tipik ug inspiration sa akong pagka media.
Buot nakong ipasabot mao ang kamatayon sa akong suod nga higala nga si Pablito “Bobby” Nalzaro kon naila sa kadaghanan nga Super Bob kinsa nipanaw na sa laing kalibutan niadtong Huwebes, Marso 17, 2022 sa alas tres sa hapon sulod sa usa ka tambalanan.
Ang kamatayon ni Super Bob nakapatay-og kanamong mga sakop sa prensa dinhi sa Sugbo tungod kay usa siya sa giila nga haligi ug gabayan sa among propisyon nga sama ra sa pagserbisyo usab sa katawhan.
Dili lang kaming anaa sa media, kon dili apil na usab kadtong mga bul-og sa mga nagsunod ug niidolo kaniya sa natad sa pagpanibya ang nasurprisa sa kalit niyang pagtaliwan.
Taodtaod na nga nagsulod-gawas si Super Bob sa tambalanan tungod sa komplikasyon sa iyang sakit, apan wa kini gibutyag namo ngadto sa publiko isip pagsanong sa iyang hangyo.
Giingon nga ang tanan may kinutuban man, ug subo palandungon nga si Super Bob, sa edad nga 58-anyos, sayo nga nipauli sa sabakan sa atong Labaw nga Makagagahom.
Sa iyang panibya, si Super Bob naila sa iyang pagka hard-hitting radio commentator ug columnist. Dili mahadlok nga mosabwag sa kamatuoran, andam moatubang sa bisan pa man ug kini naghatag og dakong hulga sa iyang kaugalingon.
Apan sa tago si Super Bob adunay kinaiya o hiyas nga malumo og kasingkasing, matinabangon ug maluloy-on.
Mao kini mga rason kon nganong daghan ang motimbaya kaniya sa matag higayon nga siya ikahimamat. Dali nga duolon ug humok usab nga hangyuon.
Hataas ang among kasinatian ni Super Bob ug kini nagasukad pa niadtong uwahing bahin sa tuig 1980s sa dihang nakadesider ako sa pag-itsa sa akong karera ngadto sa arena sa pagka media.
Nagsugod ako isip patrol beat reporter sa Bombo Radyo-Cebu diin siya maoy among production manager. Sa higayon nga siya ang mag-anchor sa programang Zona Libre, ako usab ang usa sa iyang mga field reporters.
Ubos sa liderato ni Super Bob, daghang leksiyon nga akong nakat-onan. Kini taliwala sa mga hulga ug hudlat nga among mahibagat.
Apan kining tanan amo nang giisip nga kabahin ug tipik na sa among trabaho. Milatas ang panahon ug misulod ako sa pagpanulat sa mantalaan nga mao ang nasira na nga Newstime Daily ug dayon sa SunStar-Cebu.
Wala usab magdugay nag-abot gihapon ang among dalan ug ning higayona ubos na sa SunStar Superbalita.
Ubos sa hangyo ni Atty. Pachico Seares, among Editor-in Chief, ako mismo ang miadto ni Super Bob sa iyang buhatan aron pag-imbitar nga mamahimo namo siyang kolumnista. jun.migallen22@gmail.com