Moabot sa P800,000 ang danyos sa sunog nga miulbo sa alas 10 sa buntag sa Sabado, Marso 19, sa bus stop station sa Sityo Pikas, Barangay Luyang, lungsod sa Carmen, amihanang Sugbo.
Si Police Lieutenant Jose Dante Talandron, deputy station commander sa Carmen Police Station, nibutyag nga alas 11:15 gideklarar dayon sa Carmen Fire Station nga hingpit nang napawong ang sunog human sa kapin sa usa ka oras nga pagkombate sa kayo.
Dugang ni Talandron nga ang nasunog mao ang Bus Stop Station o mas nailhan nga Bastap, hunonganan sa Ceres Bus nga nagbiyahian sa amihanang bahin sa sugbo.
Ang 80% porsiyento sa estruktura naugdaw apil na ang mga nag-abang nga mga tindahan sa atubangan sa station.
Matud ni Talandron nga subay sa pagsusi sa mga bombero, dili pa nila masuta ang hinungdan sa sunog samtang nagpadayon pa ang imbestigasyon sa Carmen Fire Station.