Gibinlan og lama ang pagselebrar ni Lebron James sa scoring milestone human gitipi sa Washington Wizards ang Los Angeles Lakers, 127-119, sa National Basketball Association (NBA) regular season game kagahapon.

Naapsan ni James si Karl Malone sa ikaduhang pwesto sa NBA all-time leading scorer, apan wa makompleto ang iyang pagmaya tungod kay naawog sila sa mahika sa Wizards ug ni Kristaps Porzingis.

Ang lusot ni Lebron James nga miresulta sa layup sa 5:20 sa second quarter maoy nakabutang kaniya sa No. 2 NBA all-time leading scorer bitbit ang 36,930 career points.

Nagkaduol na si James sa NBA all-time leading scoring nga si Kareem Abdul-Jabbar nga adunay 38,387 puntos. Naay tsansa nga maapsan kini ni James sa sunod nga season. Ang bigman nga si Karl Malone (36,928) nga miretiro niadtong 2004 nahagsa ngadto sa ikatulong pwesto sa leading scoring list.

Ang Wizards gilubong og 16 puntos apan nakabawi kini luyo sa pagpangulo sa 7-foot-3 Porzingis, nga miiskor og 16 sa iyang 27 puntos sa fourth quarter.

Mipabuhagay og clutch 3-pointer si Porzingis sa nahabiling 38 segundos sa duwa aron inaton sa unom ang labaw sa Wizards. Wa na makabawos ang Lakers sa ilang posisyon.

Midominar ang Wizards sa ikaupat nga hugna sa duwa nga adunay 34-20 scoring advantage.

Si Kentavious Caldwell-Pope mikamada’g 18 puntos samtang mitunol ug 17 puntos matag usa si Deni Avdija ug Daniel Gafford alang sa Wizards.

Gitapos ni James ang historic night nga adunay 38 puntos ug midugang ang do-it-all guard nga si Russell Westbrook og 22 puntos. Ang Lakers nahagsa ngadto sa 30-41 standing, anaa sa ikasiyam nga pwesto sa Western Conference.