Tag-iya sa usa ka balay kasamtangan nga gibalhog sa selda sa Mambaling Police Station human gisuwayan niya og sunog sa Sabado sa kaadlawon, Marso 19, ang ilang balay sa Sityo Tinabangay 2, Barangay Mambaling, Dakbayan sa Sugbo gamit ang lighter.
Ang suspek giingong wa sa maayong pangisip tungod sa giingong pagkagumon sa ilegal nga drugas.
Matud ni FO2 Fulbert Navarro, duty fire investigator sa Cebu City Fire Office (CCFO), nga si Loydicito Jimeno Ortega nasakpan sa iyang uyoan nga si Demetrio Navarro nga nisunog na sa iyang lawak.
Si Demetrio maoy nangunay pagdakop sa iyang pag-umangkon ug iyang gidala sa police station.
Dugang ni Navarro nga dunay bahin sa sulod sa kwarto sa panimalay ni Ortega nga nakan-an sa kayo, apan maayo na lang gani nga nabantayan sa mga silingan ug dali nga natabang hinungdan nga wa makadako.
“Maayo na lang gani nga natabang kay og midako pa, daghang balay ang maangin kay pulos sikitsikit.." matod ni Navarro.