Usa ka babaye nga nangompra sa usa ka tindahan sa Barangay Tabunok sa dakbayan sa Talisay nabiktima sa Salisi gang, mga suspek nga nisakiyo sa pitaka sa biktima nga dunay sulod nga mga ATM card.
Si Patrolman Raffy Rempojo, imbestigador sa Talisay City Police Station, niila sa biktima nga nagreklamo nga si Edeline Cuenca, hingkod ang edad.
Sa sumbong ni Cuenca ngadto na sa Talisay City Police Station nga samtang nangompra kini kuyog ang iyang anak sa school supplies nga bahin sa tindahan, dunay upat ka babaye ang ningduol ug milingawlingaw kaniya hangtud nga nabantayan niya nga nawala na ang pitaka niini.
“Mao to nga dali nga miadto ang biktima sa management sa tindahan aron tan-awon kon kinsa ang nikuot sa iyang bag ug didto nahibaloan nga katong upat ka mga babaye,” matod ni Rempojo.
Nasakiyo sa upat ka Salisi girls ang pitaka sa biktima nga dunay sulod kwarta nga 250 euros, 90 US dollars, P18,000, mga ID ug ATM cards nga naa sa pitaka.
Usa sa nakapalagot sa biktima naka-withdraw pa ang mga suspek og P18,000 gikan sa usa sa iyang ATM tungod sa password naa sud sa pitaka.
Ang Talisay City Police Station nagpadayon pa sa pag-identify sa pagkatawo niining mga suspek kay mga nawong pa lang niini ang ilang nailhan subay sa capture sa CCTV.
Samtang gidugang ni Rempojo nga dili lang ni maoy unang higayon nga dunay nakuotan sa maong tindahan.
Awhag sa Talisay Police sa kadtong mangompra nga dili unta magdala og dagkong kwarta ingon man dili mga luag nga bag ang ilang dalhon aron dili masignitan.