Kapulisan sa San Fernando misusi bahin sa armadong grupo nga misunod sa bise mayor

Bise mayor sa lungsod sa San Fernando nga si Ricci Reluya nipahibawo nga dunay nagsunodsunod kaniya nga mga armadong tawo.

Sa iyang Facebook page, gipahibawo sa bise mayor nga gisunod-sunuran og usa ka puti nga Isuzu D-Max ang iyang sakyanan sa dan sa Barangay Panadtaran niadtong Sabado, Marso 19, sa alas 7:30 sa gabii.

Kini ang iyang post, “PLEASE BE AWARE: White Isuzu D-max followed my car sa Barangay Panadtaran road. D-max was spotted around Linde since 7:30pm, (with ) 4 individuals inside believed to have firearms. With the grace of God naka notice jud mi. Please be vigilant in your surroundings. If spotted please inform local PNP #032 238 9059.”

Ang Superbalita Cebu misuway sa pagkontak kang Reluya apan wala kini mitubag.

Samtang si Police Major Efren Diaz, hepe sa San Fernando Police nga nahinabi sa Superbalita Cebu, nibutyag nga wala nagpa-blotter ang bise mayor bahin sa maong hitabo.

Apan ang San Fernando Police niklaro nga bisan pa wala magpa-blotter ang bise mayor, human nga madawat niini ang tawag sa bise mayor, nihimo dayon sila og checkpoint.

“Bisan wala pa ni na-blotter apan nag-imbestigar ta ani nga incident. Actually, we will be having a meeting with the vice mayor so that we will know sa plate number sa sakyanan aron atong ipa-verify,” matod ni Diaz.

Dugang ni Diaz nga si Reluya wala nay police escorts human gilibkas na human nalubong ang gipatay nga magtiayong Barangui-an.

Dugang ni Diaz nga kon gusto nga mokuha og police escort ang kampo ni Reluya, mahimo sila nga mo-request sa higher headquarters sa Philippine National Police (PNP) pinaagi sa buhatan sa Commission on Elections (Comelec).

Pwede usab makakuha og private escorts si Reluya samtang nag-request pa kini ngadto na sa mga agency nga accredited sa PNP.