SIKOP ang duha ka giingong peke nga dentista atol sa entrapment operation sa Mati City Police Station ug sa Criminal Investigation and Detection Group-Davao Oriental Provincial Field Unit ug ang Regional Special Operating Team sud sa usa ka inn sa Barangay Central, Mati City, Davao Oriental.

Ang Mati City police nag-ila sa mga dinakpan nga sila alyas Mohammad ug alyas Nornor, pulos hamtong ang pangedaron.

Una niini, gireklamo ang mga nahisgutan og illegal practice of dentistry pinaagi sa paghimo og mga braces nga walay pagtugot gikan sa Philippine Dental Association.

Tungod niini, gikasa sa awtoridad ang usa ka entrapment operation diin ang mga pulis nagpakaaron-ingnong mga kliyente.

Dihang positibo ang mga dinakpan nga mohimo sila sa ilang ilegal nga gimbuhaton, gilayon silang gipangposasan sa awtoridad.

Nakuha sa posisyon sa mga dinakpan ang mga dental supplies ug mga paraphernalia dungan sa pagkustodiya sa mga suspek diin giandam na ang kasong pagsupak sa Republic Act 9484 kun Philippine Dental Act of 2007 nga ipasaka batok sa kanila didto sa korte.