SA MARSO 25 ang opisyal nga petsa sa pagsugod sa kampanya sa mga local nga kandidto gikan sa kongresista, mayor, bise mayor ug konsehales. Niadtong Pebrero 8, 2022, nagsugod ang kampanya pagka presidente, bise presidente, senador, ug party-list. Sa Mayo 7, 2022, mahoman ang kampanya sa tanan kandidato, nasyonal ug lokal.
Apan nakamatikod ta nga human sa pagsumitir sa sertifiko de kandidatora niadtong Oktubre 2021 sa mga modagan sa piliay sa Mayo 9, 2022, nagsige na sila og pangampanya pinaagi sa lamano, kulokabildo, suroy-suroy, ug bisita sa ilang mga lider. Gani, daghan na kaayo ang tarpaulin ug poster sa mga kandidato nga gipamitay ug gipapilit sa mga koral.
Kaniadto, sa wala pa mauso ang social media, ang mga kandidato dunay mga bokador nga anha magtagawtaw sa mga radio sa binayran nga oras. Pung pa sa akong amigo, magbura-bura ang baba sa mga bokador sa pag-atake ug yagyag sa hugaw sa kaatbang sa ilang gisuportahan nga kandidato. Tungod kay sa radyo man ang mga atake, dali ra nga mawala sa kahanginan.
Karon, social media na ang gigamit sa mga kandidato sa pagpalambo sa ilang kandidatora ug pagbunal sa ilang kaatbang. Naa gihapon ang radyo. Sa social media, makabasa ta kada adlaw sa mga estorbot (estorya nga botbot) nga ginama sa trolls sa kandidato. Gani, ang mga kandidato nga dunay daghan pundo naa silay gitawag nga troll farm, nga magbantay sa atake sa ilang agawon ug mobawos pinaagi sa bugal-bugal ug fake news batok sa ilang kaatbang.
Ang dili makamao mosusi sa mga estorya nga gikan sa troll farm sa mga kandidato dali nga motuo sa bakak o di ba kaha maglibog kon unsay tinuod sa mga estorya nga nanggawas sa social media. Ang nakaparat pa gyud kay dunay uban nga moderetso lang og pasa ngadto sa uban sa walay pagsusi kon tinuod ba o dili ang ilang nabasahan.
Ang tanan nga klase sa baho sa mga kandidato nanggawas na. Ang uban ani dunay kamatuoran apan duna say mga pang-atake lang sa mga kandidato ug walay sumbanan. Aron kitang mga botante di maglibog ug dili mailad sa mga bakak o pagwapo nga estorya sa mga kandidato, ang maayo nga atong basahon ug sundan mao ang mga estorya nga napatik sa mga mantalaan.
Sa laing bahin, duna na bay pamaagi ang Commission on Elections (Comelec) alang sa umaabot nga piliay sa Mayo 9, 2022 aron malikay ta sa takod unya sa Covid-19? Kon wa ko mahikalimot, ang gipasupot sa Comelec mao ra gyud ang physical distancing. Matoman kaha ni nga matagpiliay magpunsisok man ang mgabotante? Ang maayo unta mao ang advance voting sama sa gibuhat sa Amerika aron mabahig ang botante.
Sa akong pangagpas, ang buhaton sa Duterte administration agi'g preperasyon sa umaabot nga piliay mao ang pag-ubos ngadto sa Alert Level 1 sa tanan probinsya ug siyudad. Ang Alert Level 1 karon mao ang Aklan, Bacolod city, Capiz, Guimaras, Ilioilo City, Cebu City, Siquijor, Biliran, Ormoc City, ug Tagbilaran City.
***
Among kinasingkasing pahasubo sa nagbangutan nga pamilya ni Pare Bobby "Super Bob" Nalzaro sa iyang hinanali nga pagpanaw. Rest in eternal peace with our Creator, Pre!