ANG "second collection" sa misa sa simbahan sa Nuestra del Pilar sa Zamboanga Sibugay gipahinungod sa biktima sa giyera sa Ukraine. Ang Ukraine usa ka nasud nga sakop kanhi sa gitawag nga Union of Soviet Socialist Republic of Russia (USSR).

Sa nilabay'ng mga semana, nagsugod ang giyera didtong dapita tungod sa hinungdan nga lisud matugkad sa ingong natong yanong lungsuranon.

Ang atong nabalitaan lang nga gisulong sa mga sundalong Russia nga gipangulohan ni Presidente Vladimir Putin ang nasud sa Ukraine nga gipangulohan usab ni Presidente Volodymyr Zelenskyy.

Liboan ka mga pamilyang lumulupyo sa Ukraine ang nanglalin karon ngadto sa Poland ug mga kasikbit nga nasud sa Europa sa pag-ikyas sa bala ug bomba nga gipabusikad sa Russia. Ubay-ubay na ang nangamatay, kadaghanan niini mga sibilyan nga naipit sa away sa duha ka nasud.

Wala akoy gidapigan sa duha ka nasud tungod kay kulang ang atong kahibalo sa tinuod nga lintunganay sa ilang buroka, hinunua, sa akong tan-aw dili patas ang away.

Daw "super-power" nga oso o "bear" ang Russia samtang mora la'g gamay'ng iring ang Ukraine. Kaya nga pulbuson sa Russia ang tibuok Ukraine sulod sa usa ka semana kung buot nilang buhaton. Ang kanhing nindot nilang lugar nga puwedeng ibutang sa "postcard" kay mora na'g hulagway sa naguba nga siyudad sa "World War II."

Hinuon isog kaayo ang ilang presidente nga nagpasibaw sa ilang kasigmuyo tungod kay mora'g gibiyaan na sila sa America ug mga nasud nga sakop sa North American Treaty Organization (Nato). Pipila ka semana human nisulong ang Russia sa Ukraine, walay tabang nga gipadala ang Nato kanila. Akong nabasa nga gisulsulan sila sa US nga moapil sa Nato nga gikasuko sa Russia.

Busa niadtong niaging semana, niadto siya sa US Congress aron ipasibaw ang iyang panginahanglang tabang sa ilang nasud.

Ug tuod man, niadtong Marso 16, nagpagawas gidayon og listahan si US President Joe Biden sa armas nga iyang ipadala sa Ukraine, sama sa: 800 stinger anti-aircraft systems; 2,000 javelins; 1,000 ka light anti-tank weapons; 6,000 AT-4 anti-tank armor system; 100 tactical unmanned drones; 100 grenade launchers; 5,000 rifles; 1,000 pistols; 400 shotguns; 20 milyon nga bala; og 25,000 sets sa body armor ug helmets.

Matud pa sa tigpaniid nga kulang ra kaayo kining maong armas kung itandi sa panginahanglan sa mga sundalo sa Ukraine ug sa armas nga anaa sa pikas kampo.

Hinuon, makatabang na kini kanila ilabi na ang "stinger anti-aircraft system" nga mopatikangkang sa helicopter ug jets nga namomba sa mga siyudad sa ilang nasud.

Apan sa akong tan-aw, dugang lang gisugnuran sa US ang giyera sa duha ka nasud. Mosamot ang pagdumot sa Russia sa US ug maklaro na ang pagbalik sa "cold war" sa duha ka higanteng nasud nga sa akong tan-aw maoy mitsa niining tanan. Dugay nang plano sa US nga piangan ang Russia apan dili kini niya direktang mahimo busa gigamit niyang paon ang Ukraine alang sa maong tinguha.

Busa, padayon ta sa pag-ampo nga moundang na ang giyera.