TAGUM CITY, Davao del Norte -- Pakyas ang awtoridad nga masikop ang gipailawom sa search warrant, apan malampuson ang pagkasakmit sa mokantidad sa P5.8 milyon sa gituohang shabu sa gikonsiderang top 16 city level drug personality sa Visayan Village sa dakbayan sa Tagum, Marso 20, 2022.

Kauban sa Tagum City Police Station ang Provincial Drug Enforcement Unit (PDEU) sa Davao del Norte, ilang nasud ang panimalay sa suspek nga si alyas Michael, apan ang asawa niini ang naabtan, hinungdan nga gibasahan kini sa search warrant aron mapahigayon ang pag-rekisa sa panimalay suspek.

Pipila ka minutos ilang nakita ang motimbang sa 864.4082 gramo sa gituohang shabu mga drug paraphernalia, ug usa ka .45 nga kalibre sa pusil nga dunay lima ka mga buhing bala.

Gilayong gidala ang mga nakuha nga ebidensiya ngadto sa Davao del Norte Provincial Forensic Unit aron ipailawom sa eksaminasyon.

"I’m optimistic that in due time, we can achieve to make davao region a drug free region in the Philippines," matud ni Police Brigadier General Benjamin Silo Jr. director sa Police Regional Office-Davao.