NAHARANG sa mga operatiba sa Task Force Davao ug Davao City Police Office ang usa ka sakyanan nga alegasyong maoy gigamit sa pagpatay sa usa ka retired police officer sa Cotabato City.
Alas 12:30 kagahapon sa tungang gabii, Marso 21, 2022, naharang ang maong sakyanan sa AFP-PNP checkpoint sa Barangay Sirawan, Toril, Davao City.
Subay sa taho, usa ka kolor itom nga Suzuki Mini Van Transformer dunay plate number MAV 3543 ang alegasyong maoy get-away vehicle sa mamumuno nga mipatay kang Cotabato City Public Safety Officer Retired Police Col. Rolen Balquin kinsa nahagba sa Mr. Moussetache Milk Tea, sa Sinuat Avenue, Rosary Heights 10, Cotabato City sa nakalabay nga mga adlaw.
Nasayran nga ang intelligence unit sa Cotabato City Police Office nagkomperma nga ang naharang nga sakyanan nagtugma sa diskripsyon sa behekulo nga na-record sa CCTV footage duol sa nahitaboan sa krimen.
Gikompirma nga tulo sa mga sakay sa mini-van ang na-indorso na ngadto sa Cotabao City Police Office ug sa Criminal Investigation and Detection Group-Bangsamoro Region samtang ang laing duha gidala sa Davao Medical School Foundation Hospital sa Davao City alang sa ilang medical nga rason.
Tungod niini, ang Task Force Davao ilawom ni Commander Colonel Darren E. Comia, mikondena sa maong hitabo, kinsa nanganti nga wala gayo'y mga dautang elemento nga makasud sa dakbayan sa Davao.
Padayon gihapon ang makuting imbestigasyon sa awtoridad sa maong hitabo aron maila ug masikop ang mga responsable.