NAGPANIKAD na ang riders sa Sugbo ug ubang mga dapit sa nasod sa pagbalik sa kulbahinam nga aksyon sa 22nd Lou Ornopia Motocross Cup karong Abril 10, 2022 sa MS Motosuit Motorsports Park sa Barangay Calambua, lungsod sa San Remigio, Cebu.
Sulod sab sa duha ka mga tuig nga naundang ang aksyon sa kompetisyon tungod sa pagkuyanap sa Covid-19 sa tibuok kalibutan hinungdan nga grabe ang kahinam sa mga mahiligon og motocross.
Niadtong Septiyembre, 2021, gilusad na unta ni Cebu sportsman Lou Ornopia ang iyang multi-sport park sa tinguha nga buhion og balik ang motorsports sa San Remigio ug ingon man hatagan og panginabuhian ang mga residente sa lungsod panahon sa pandemya.
Apan gumikan sa mga restriksyon nunot sa pandemya nga gitiwasan pa sa paghaguros sa bagyong Odette, nasanta ang tinguha ni Ornopia.
Ning higayuna nga hinayhinay nang mibalik sa normal ang sitwasyon ug gipaubos na sa Alert Level 2 ang probinsya, wala’y giusik nga panahon si Ornopia aron makapahigayon na’g balik sa kompetisyon.
“Nalipay gyud ko nga Alert Level 2 nata. Mapadagan na gyud nato ang atoang mga plano apil na niini ang paghimo sa Calambua (San Remigio) nga motocross capital sa Cebu,” padayag sa kanhi “Sportsman of the Year” awardee sa Sportswriters Association of Cebu (SAC).
Matod ni Ornopia nga ang kompetisyon magsilbeng reunion sa riders sa Visayas ug Mindanao nga dugay na nga wala nagkatapok.