GRABEHA na sa kalisod nga gipas-an sa katawhang Pilipinhon resulta ning gubot didto sa Russia ug Ukraine nga niresulta sa pagsulbong sa presyo sa lana. Hinuon aduna nay pahibawo nga posibli karong adlawa adunay rollback sa presyo sa lana apan temporaryo lang.
Ning nahitabo, si Presidente Rodrigo Duterte nagpahibawo nga mohatag ang gobyerno og dugang P200 matag sakop sa Pantawid Pamilyang Pilipino Program (4Ps) aron maabagan ang ilang kalisod ning pagsaka sa presyo sa gasolina. Moabot sa 12 milyones ka mga tawo ang sakop sa 4Ps sa tibuok nasod.
Ang mga sakop sa 4Ps nagdawat og P750 matag buwan isip health ug nutrition grant, laing P600 isip rice subsidy unya adunay educational assistance nga nagkantidad og P700 alang sa senior high school, P500 sa junior high school ug P300 sa elementarya. Ang P200 nga dugang pwerte ra ka gamay kon atong huna-hunaon ilabi na sa kamahal karon sa mga palaliton.
Ang dugang P200 pwede na kaayo ning madugang og ipalit og bugas nga mosobra sa tulo ka kilo o kaha ikapalit og de lata aron maoy masud-an. Kon daghan ang sakop sa pamilya, posible duha ka adlaw ra kining tulo ka kilo nga bugas. Mangita na usab og laing kwarta aron makapalit na usab sa ilang pagkaon ug uban pa.
Daghan kaayo ang nangalipay ining 4Ps kay nakatabang paghupay sa ilang kalisod ug ang pipila ka kabataan nakalampos na sa ilang pagtuon ug nakatabang na sila sa ilang pamilya sa pagkakaron.
Makasubo lang kay adunay uban nga mga miyembro sa 4Ps nga atong nasuta pinaagi sa final requirement nga gihimo sa akong mga tinun-an sa subject nga investigative journalism nga ang ilang subsidy nga madawat matag buwan dugay nang nahurot. Ang uban ila nang gibaligya ang ilang cash card unya gigamit na nila ang tibuok tuig nilang madawat.
Ang ilang nadawat nga salapi gikan ning ilang madawat nga ayuda sa gobyerno gipamalit og appliances samtang ang uban giduwa sa sugal sama sa tigbakay ug uban pa. Naglaum ta nga kining dugang P200 gamiton sa pagpamalit sa unsay ilang gikinahanglan sa balay.
Ikalipay kaayo namong mga magbubuhis nga kining dugang nga ayuda nga ihatag sa gobyerno gamiton sa makaayo nga butang aron makatabang sa ilang kalisod nga ilang gisinati karong mga panahona. (josephelvirtubilan@gmail.com)