Dura: Biktima sa 'fake news'

SUKAD nagsugod ang kampanya sa umaabot nga eleksiyon, mikuyanap sab ang giingong "fake news" kun balita nga walay kamatuoran.

Halos tanang kandidato niingon nga sila biktima sa "fake news" nga gisugo sa ilang kontra sa politika.

Sa akong namatikdan, nag-unang biktima sa "fake news" mao si Vice President Leni Robredo sukad pa sa unang mga bulan sa iyang paglingkod isip ikaduhang pangulo.

Daghang isyu ang gipakatap sa mga tawo nga di makadawat nga napildi ang ilang kandidato nga si kanhi Senador Ferdinand "Bongbong" Marcos, Jr. sa 2016 nga eleksiyon.

Gani, mga opisyales pa sa gobyerno nga mga tinudlo ni Pangulong Rodrigo Duterte ang nagpakatap sa "fake news."

Ning eleksiyona, wala sab nagpalupig si presidential aspirant Bongbong Marcos kinsa nagsulti nga siya ang labing unang biktima sa "fake news" human migawas ang balita nga aduna siyay wala gibayaran nga buhis nga mokabat sa P203 bilyones.

Sukad misulbong ang internet ug social media, nauso usab ang "fake news" aron linglahon ang mga tawo. Kini ang atong kontra sa pagpakaylap sa kamatuoran.

Nakadaut kini tungod kay makamugna kini og kasuko ug di pagsinabtanay sa matag usa labot sa personal o kaha sa politika.

Hinuon, kun ato gyud subayon, di lang karon nauso ang "fake news." Sukad pa kaniadto nga wa pay internet, kabahin na kini sa kinabuhi sa tawo. Mao man bitaw nga naay maghusayay sa barangay tungod lang sa di tinuod nga balita.

Ang pagsumpo sa fake news dakong hagit kanato nga mga responsableng lungsuranon tungod kay subay sa survey sa Massachusetts Institute of Technology, migawas nga ang mga tumo-tumo nga balita maoy tuohan sa katawhan.

Busa, ning panahon sa eleksiyon, angay kita nga magmaduha-duhaon sa mokatap nga balita sa social media. Kun aduna may isyu, ato gyud susihon kun duna bay kamatuoran sama sa balita sa media outfits, ilabina sa mga dokumento sa kaso sa korte nga gikalambigitan sa usa ka politiko.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph