NAGMAHAY sa iyang gihimo ug nalagot sa kaugalingon nganong nalambigit pa sa babaye nga wa nagmahal kaniya.
Kini ang gisaysay sa 18-anyos nga ulitawong lalaki nga taga Crossing Bayabas, Toril, Davao City ngadto sa awtoridad human siya naluwas gikan sa iyang pagsaka sa 120 feet nga billboard sa Puan, Davao City, Lunes sa gabii, Marso 21, 2022.
Pasado alas 9 p.m. nakanaug gikan sa tumoy sa billboard ang ulitawo pinaagi sa negosasyon sa awtoridad nga gilangkuban sa Women and Children Protection Desk (WCPD) sa Talomo Police Station nga gipangunahan ni Police Lieutenant Helen Tabada ubos sa superbisyon sa hepe nga si Major Noel Villahermosa ug sa mga personahe sa Bureau of Fire Protection (BFP), Central 911 Urban Search and Rescue (USAR), CTTMO ug medical team sa Central 911.
Nasayran nga gikan pa sa Toril ang lalaki.
Nag-trending pa sa Facebook ang live feed sa netizens nga nakasaksi sa pagsaka sa maong lalaki, apan wa niya kini panumbalinga, mapagawas lang kuno ang iyang gibati nga kasakit sa dughan.
Human sa dul-an duha ka oras nga negosasyon, napakanaug ang maong lalaki, ug gilayong gikarga sa ambulansya sa Central 911.
Gilayong giistorya ang maong lalaki sa mga pulis sa Talomo Police Station hangtud nga nasayran nga brokenhearted diay kini.
Hinuon, giintrigo na sa kapulisan ang nahisgutan ngadto sa mga pamilya niini sa Toril.
Kung ikaw may kailang nanginahanglan og tabang, o ikaw mismo nanginahanglan og masultihan sa imong gihambin nga emosyon, mamahimo nimo ni sila nga makontak: DOH SUICIDE PREVENTION HOTLINES: 0917-899-8727 (USAP) 0917-989-8727 (USAP).