NAPULO ka binuhing mga kanding ang nangapaig, tag-iya nga niluwas kanila naangol sa sunog alas 12:41 sa kaadlawon sa Martes, Marso 22, sa Sitio Ilaya, Brgy. Cawayan, lungsod sa Dalaguete.
Ang biktima giilang si Melicia Ceballos, 60, biyuda.
Si Major Gilfred Baroman, hepe sa Dalaguete Police Station nga nahinabi sa Superbalita Cebu, nagkanayon nga ala 1:30 sa kaadlawon, nakadawat sila og tawag kabahin sa “goat ranch” nga nasunog.
Dali silang ningresponde sa dapit, diin naa usab ang mga sakop sa kabomberohan sa Dalaguete, apan naugdaw na ang rantso sa ilang pag-abot.
Sumala pa ni Baroman nga sa ilang pag-imbestigar, ang sunog nagagikan sa mga biya nga sagbot nga lawog sa kanding.
Ang mga sagbot nga uga na kaayo nga diha sa sawog nikayo unya ang sawog kay plywood, paspas ang pagkatap sa kayo.
Nagpadayon ang imbestigasyon pagsuta kon diin gikan ang kayo.