ADUNA na’y bag-ong miyembro ang Philippine Basketball Association (PBA).
Kini mao ang Converge ICT Solutions, usa ka internet provider nga kompanya nga maoy nakapalit sa prankisa sa Alaska Aces.
Sa press conference kagahapon, Marso 23, 2022, gibutyag ni commissioner Willie Marcial nga opisyal na’ng nabalhin sa Converge ICT Solutions ang pagpanag-iya sa prankisa sa Alaska.
Tanang miyembrong teams sa PBA ning-uyon ning maong kalambuan.
Ang kanhi commissioner sa liga nga si Chito Salud maoy napiling team governor sa Converge, nga gipanag-iya ni Dennis Anthony Uy.
Sa miaging, ang Alaska nibuhi og makapakurat nga anunsyo nga hingpit na silang mobiya sa labing unang professional nga liga sa Asya.
Sa 35 ka mga tuig nilang pagduwa sa PBA, ang Alaska nakabira og 14 ka mga titulo nga gibuwakan sa talagsaon nga Grandslam title niadtong 1996.