GIPANGMAKMAK sa Magnolia Ang Pambansang Manok Hotshots ang Meralco Bolts, 94-80, sa Game 1 sa ilang best-of-five semi-finals series sa Philippine Basketball Association (PBA) Governor’s Cup kagahapon, Marso 23, 2022, sa Mall of Asia Arena sa Pasay City.
Ang Bolts mao unta ang unang nakaarangkada ug nakakulit kini’g 22-12 nga labaw human sa 1st quarter.
Sa halftime, igo lang napahakan og gamay sa Hotshots ang labaw sa Bolts, 43-35.
Sa 3rd quarter, hingpit nga nausab ang dagan sa estorya dihang nakapupo og 29 puntos ang Hotshots kumpara sa 13 puntos lang sa Bolts.
Kontrolado na sa Hotshots ang duwa sa 4th quarter.
Ang Hotshots gipangulohan sa ilang import nga si Michael Harris pinaagi sa iyang 22 puntos, nidugang og 18 puntos si Paul Lee samtang niamot og 17 puntos si Mark Barroca.