GIPANGBUHAGAY ni World Boxing Council (WBC) featherweight champion Mark Magsayo nga ang sunod niyang misyon mao ang mahimong unified champion.
Sa online Philippine Sportswriters Association forum, giangkon ni Magsayo nga dili kini sayon nga tahas apan buhaton niya ang tanan aron matuman ang iyang tinguha.
Dihang nilarga si Magsayo paingon sa Amerika kauban ang iyang asawa nga si Frances atol sa pagkuyanap sa pandemic, nisaad siya nga dili mobalik sa Pilipinas kon dili siya mahimong world champion.
Niadtong Enero, 2022, natuman ang iyang tinguha human niya nailog ang WBC belt gikan kang American Gary Russell pinaagi sa majority decision nga kadaugan.
Apan sa dili pa siya maghuna-huna sa paglangkat og laing titulo sa iyang timbang, kinahanglan unang sagubangon ni Magsayo ang sunod niyang tahas.
Ang 26 anyos nga Boholano nakatakdang modepensa sa iyang bakus batok sa iyang mandatory challenger nga si Mexican Rey Vargas karong Hulyo 9, 2022 sa San Antonio, Texas.
Si Magsayo adunay 24-0, 16KOs nga rekord.