DIGOS CITY, Davao del Sur -- Pakyas ang awtoridad nga masikop ang target sa operasyon, apan lima ka mga parokyano ang nasikop atol sa drug raid sa gituohang drug den alas 5:46 sa hapon, Marso 21, 2022, didto sa Purok Kalingkatan, Sitio Punta Biao, Barangay Cogon.

Subay sa report gikan sa Philippine Drug Enforcement Agency (PDEA)-Davao, usa ka hiniusang puwersa sa awtoridad ang mironda sa nasampit nga drug raid diin anaa ang mga personahe sa Davao del Sur Police Provincial Office ug Digos City Police Station.

Nakasibat ang target nga si alyas Gaw dihang namatikdan niini nga dunay nagsingabot nga mga pulis.

Wa sab kabantay ang lima ka parokyano, hinungdan nga nangasikop ug nakuha sa ilang posisyon ang mga drug paraphernalia ug mga pakite sa gituohang shabu nga mokantidad sa P255,000.

Sumala sa PDEA-Davao, dakong tabang ang paghatag og impormasyon gikan sa nagpakabanang katawhan sa pagsumpo sa ilegal nga druga sa komunidad.