MOABOT og 186 ka manindahay ug 80 masahista ang nanukad alang sa subling pagbukas sa Roxas Night Market karong gabii, Marso 24, 2022, human sa duha ka tuig nga pagkasuspende, sumala sa Public Safety and Security Command Center (PSSCC).
Si PSSCC head Angel Sumagaysay nagbutyag atol sa press conference kagahapon, Miyerkules, Marso 23, nga ang 186 ka mga manindahay gitunga ngadto sa kategoriya kon diin 56 kanila nakatuka sa mga pagkaon ug ang 65 mamaligya og Ready-to-Wear (RTW) ug Accessories, samtang dunay 80 ka masahista apan mahimo pang tugtan ang 100.
"We had a conversation with the vendors na na-swerte na sila ang unang makapag-display dira sa night market. Na-isa-isa na natin ang do's and dont's and hopefully mag-abide sila sa atong guidelines," matud ni Sumagaysay.
Dugang pa niya nga dugang mga manindahay tugtan kon ang pagbukas karon sa lugar hapsay.
Sumala sa PSSCC nga ilang gipakubsan ang ihap sa mga manindahay nga gitugtan ug matag usa gipili pinaagi sa "open raffle strategy" kon diin mga interesado mahimong mosumite og entry, naglakip niadtong wala pa mabakunahi.
"Hindi siya nakalagay doon sa guidelines but then, we encourage (the vaccination) and we check naman," tataw ni Sumagaysay.
Samtang gisuwat ning balita Miyerkules, ang PSSCC wa pay datus sa vaccination rate sa Roxas Night Market vendors.
Gikanayon ni Davao City Covid-19 Task Force spokesperson Dr. Michelle Schlosser nga mga manindahay wala gi-require nga magpabakuna tungod kay ang lokal nga panggamhanan sa Davao wala magpatuman og "mandatory vaccination."
Apan kinahanglan nga obserbahan ang nag-unang minimum health protocols sama sa saktong pagpanghugas og kamot ug paggamit og face masks kay istrikto pa gihapon kining ipatuman.
"Dili gyud sapilitan ang bakuna, we can only give them education and accurate information. We will continue to have dialogues with them to convince sila kung unsa ang importansya and benefit sa bakuna. Pero dili gyod nato sila i-discriminate na just because they are not vaccinated, dili na nila ma-enjoy ang privilege of going to the night market," tin-aw ni Schlosser nga nagtumbok sa mga manindahay ug mga bisita sa Roxas Night Market.
Samtang gipaneguro ni Sumagaysay nga ang PSSCC mopakatap og mga personahe aron nga istriktong ipatuman ang security measures aron nga maseguro ang kaluwasan sa mga manindahay ug mga kustomer, lakip na ang usa ka entrada ug gawsanan nga palisiya ug ang pagdili sa pagdala og backpacks ug jackets.
Tug-an sab niya nga ang ubang mga ahensiya sa lokal nga panggamhanan patabangon sab og abag sa PSSCC bahin sa operasyon sa Roxas Night Market nga naglakip sa City Transport and Traffic Management Office, City Environment and Natural Resources Office, City Health Office, ug ang Davao City Police Office, ug Task Force Davao nga maoy motutok sa hulga sa mga dautang elemento.