MODANGOP sa mga ahensya sa kagamhanan si Cebu City Councilor Joel Garganera human niya makita nga gihasi og grupo sa mga menor de edad ang mga sakop sa Market Authority sa Dakbayan sa Sugbo.
Nakahukom si Garganera human niya makita ang usa ka kuha sa closed circuit television (CCTV) camera sa daghang mga bata nga ingon sa agresibong ninghamag sa mga personnel sa Market Authority sa merkado publiko sa Carbon niadtong Marso 11, 2022.
Nahitabo kini dihang gisugdan pagbutang sa Prevention, Restoration, Order, Beautification and Enhancement (Probe) team sa railings sa dan ML Quezon sa Carbon.
Nagduda si Garganera nga dunay vendors nga nagpaluyo sa gibuhat sa mga bata.
Matod niya nga ang paggamit sa mga bata nga nagbutang kanila sa kakuyaw usa ka matang sa pangabuso.
“I strongly condemn the use of children in situations like this, it has to stop! Spare our children! I am forwarding this video to the Commission on Human Rights (CHR), Department of Social Welfare Development (DSWD) and Cebu City Police Office Women and Children’s Desk for proper investigation in order to put an end to these abuses,” mabasa ang post ni Garganera sa social media.
Matod sa konsehal nga ang kabataan angay panalipdan sa tanang matang sa pangabuso pinaagi sa pagpalikay kanila sa makuyaw nga mga sitwasyon.
Ang railings gipabutang ni Mayor Michael Rama sa nahisgutang karsada aron way molapas nga mga manindahay ngadto sa dan.
Dunay vendors nga nangreklamo ug nangasuko hinungdan sa pagtumaw sa tensyon.
Wa sila makauyon kay ang 1.5 metros nga gilay-on duol ra kaayo gikan sa ilang mga pwesto.
Sa pagduaw ni Rama sa dapit pipila ka adlaw ang nakalabay, ilang nasabutan nga isibog pa kini og dugang 1.5 metros busa nahimo nang tulo ka metros ang gilay-on.
Gipabutang sa mayor ang railings aron di makamugna og trapiko kon dunay mga vendor nga moabot na sa karsada sa ilang pagpaninda sa Carbon.
Nagtuo ang mayor ug ang Market Authority nga di na mangreklamo ang vendors kay gihatag na ni Rama ang ilang gusto.