USA ka tourist guide nga kasagaran sa iyang mga kliyente mga langyaw gipusil patay pasado ala una sa kaadlawon sa Miyerkules, Marso 23, sa Gen. Maxilom Ave. (kanhi Mango ave.) atbang sa kanhi Fooda Supermarket sa Barangay Cogon- Ramos, siyudad sa Sugbo.
Si Police Senior Master Sergeant Jepta Jumawan sa Abellana Police Station, duty investigator on case, niila sa biktima nga si Josemesilito Suson Alcoriza, 42, molupyo sa Sityo Unit 5, Opra, Barangay Kalunasan, Siyudad sa Sugbo.
Ang biktima nailhan pinaagi sa iyang mga identification (ID) card sa pagka security guard ug postal nga narekober sa iyang posisyon.
Sa imbestigasyon sa Abellana Police Station, si Alcoriza kuyog sa usa ka Indian national apan gikan sa Australia. Ang duha nag-uban sa usa ka bar sa lugar, naglingawlingaw ug nag-inom.
Sa ala 1 pasado sa kaadlawon, nanggawas sila si Alcoriza ug langyaw ug nangaon una og itlog sa gawas sa ilang giimnan nga bar.
Pagkataudtaod nanglakaw ang duha, apan 30 metros ang gilay-on gikan sa ilang gikan-an og itlog, nakadungog ang Indian national, kinsang ngan gipugngan alang sa seguridad, og duha ka mga buto apan nagtuo siya nga usa lang kini ka pabuto.
Nahibulong ang langyaw nga nahagba og kalit si Alcoriza. Sa kahadlok sa langyaw sa dugo, wa na siya makatan-aw kinsa ang killer.
Sa pakisusi sa mga sakop sa Scene of Crime Operations (SOCO), si Alcoriza nakaangkon og samad sa ubol-ubol, tuo nga dughan ug sampot nga maoy hinungdan sa iyang hinanaling kamatayon.
Narekober sa crime scene ang tulo ka mga kabhang sa bala sa gituohang kalibre .45 nga pistola. Sa kasamtangan padayon pa ang imbestigasyon sa Abellana Police Station.
Matod ni Police Lieutenant Colonel Wilbert Parilla, deputy director for operations sa Cebu City Police Office (CCPO), usa ka freelance tourist guide si Alcoriza.
Adunay nakuha nga CCTV footage sa dapit apan naglisud sila sa pag-ila sa gunman sanglit layo kini kaayo gikan sa nahimutangan sa biktima ug langyaw.
“Karon ang atong gihimo is nag-background checking ta sa biktima and we are also trying to locate kon asa to ang foreigner karon aron makuhaan sad nato og information kon unsay ilahang activity nga gihimo before siya napusilan,” matod ni Parilla
Tungod sa maong hitabo, gimandoan sa CCPO ang mga hepe sa 11 ka police stations nga pahugtan pa ang ilang pagbantay sa mga dapit nga adunay insidente sa pagpamusil ug ipatuman ang estriktong kampanya batok sa kriminalidad.