DILI mominos 13 ka mga mayor sa Lalawigan sa Bohol nagtagbo sa usa ka restaurant sa dakbayan sa Tagbilaran kagahapon, Marso, 24, besperas sa pagsugod sa local campaign period.
Ang mga mayor ningsaad sa pagsuporta sa krusada alang sa maayo ug dayag nga pagdumala sa renda sa lokal nga kagamhanan. Sumala sa grupo, 19 sila ka mga mayor apan 12 lang ang nakatunga sa tigom.
Ang mga mayor nga ningtunga mao sila si Loboc Mayor Leon Calipusan, Panglao Mayor Nila Montero, Lila Mayor Arturo Piollo II, Ubay Mayor Constantino Reyes, San Isidro Mayor Diosdado Gementiza Jr., Buenavista Mayor Dave Duallo, Garcia-Hernandez Mayor Tita Baja, Dimiao Mayor Randolf Ang, Jagna Mayor Joseph Ranola, Candijay Mayor Christopher Tutor, Getafe Mayor Casey Shaun Camacho, Sevilla Mayor Juliet Dano ug Clarin Mayor Eugene Ibarra.
Nipadayag sila sa kasagmuyo sa administrasyon ni Gobernador Arthur Yap labi na bahin sa pandemiya sa Covid-19 ug pagbangon sa lalawigan gikan sa pagkuso-kuso sa bagyong Odette niadtong Disyembre 16.
“For the past three years, Boholanos have suffered from the lack of good governance and empathy by the current administration. The people have seen the current administration’s brand of leadership which has prioritized other things rather than giving them the services that they deserve,” tipik sa pamahayag sa grupo.
Mao kini hinungdan, matod sa mga mayor nga naa sila nagsuporta kang Bohol 2nd District Rep. Aristotle “Aris” Aumentado, nikandidato karon sa pagka gobernador atbang kang Yap.
Samtang, si Aumentado mapasalamaton sa mga mayor nga nagsuporta sa iyang kandidatura.
Matod ni Aumentado, nakahukom siya sa pagdagan isip gobernador tungod sa yangungo sa mga Bol-anon nga gusto og kabag-ohan sa probinsiya.
“Gusto nato bag-ohon ang Bohol. Unahon nato ang Bol-anon. Limpyohon nato ang Bohol kay grabe naman ang alleged kahiwian,” matod ni Aumentado.