PERTE gyod seguro kaayo kining sadyaa nga eleksyon karong Mayo, mga higala, kay nabahin gyod ang tawo diha sa gusto niya nga kolor.
Naa may kolor ang matag kampo sa mga nanglabay nga piniliay sa Pilipinas, apan karon ang pinakasadya ug pinakainit nga pagkabahin sa kolor, -- karon nga eleksyon, napamatud-an ang kamahinungdanon sa kolor ug kung paunsa mabahin ang tawo.
Sa nasud Singapore ug sa ubang mga kanasuran, kolor lang ang ilang pilion, ratsada na sa linyada sa mga politiko; sa Pilipinas lahi, gipili man nimo ang usa ka kolor, apan kung di nimo gusto ang mga kaubanan niini, makasimang gyod ka sa ubang kolor.
Sa ubang lugar sab, susama, kung moingon sab kag, UniTeam, didto pulos puwa ug green, lahi sab nga kolor kang Isko Moreno, blue sab ug puti.
Pero si Manny Pacquiao naa man sab puwa, pero ang ubang mga midagan sa pagka-Pangulo diha sa ilang linyada, wa ma'y kolor nga gidala, basta lang mipapili sila, ilang gipapelan ang ilang katungod isip usa ka Filipino.
Sa miaging adlaw, ang Partido Demokratiko Pilipino-Lakas ng Bayan (PDP-Laban) faction nga gipangunahan ni Energy Secretary Alfonso Cusi mi-indorso kang presidential bid ug former senator Ferdinand “Bongbong” Marcos Jr., apan, wala pa'y opisyal nga pamahayag nga mi-iindorso si Pangulong Rodrigo Duterte, inay dunay pamahayag ang Malakanyang nga si BBM ug PRRD nagkita, nagka-istoryahanay mahitungod sa usa ka dakong papel isip usa ka Chief Executive.
Luyo niini, nanggawas sab ang mga isyu, batok kang BBM diin subay sa report, diha'y mga nagkadaiyang grupo ang nag-rally gawas sa buhatan sa Bureau of Internal Revenue (BIR) aron ipanawagan ang ahensya nga kolektahon ang P203-bilyones nga utang sa buhis sa pamilya Marcos ngadto sa gobyerno.
Matod sa mga grupo, dili angay ibaliwala sa BIR ang giingong padayong pagdumili sa mga Marcos sa pagbayad sa maong kantidad. Matod nila, kinahanglang molihok ang BIR aron makolekta ang giingong utang sa buhis sa pamilyang Marcos.
Niadtong 1997, gimandoan sa Korte Suprema ang pamilyang Marcos nga bayran ang P23 bilyon nga utang sa buhis sa yuta. Tungod alegasyon sa padayong pagdumili sa pagbayad, niabot na sa P203 bilyones tungod sa interes.
Wa pa sab makahatag og pamahayag si Atty. Vic Rodriguez, ang chief of staff ug tigpamaba ni Marcos labot sa mga pasangil.
Sa laing bahin, human nakahukom si presidential aspirant Sen. Panfilo Lacson nga mag-independente human sa pagbiya sa Partido Reporma, si senatorial aspirant nga si Emmanuel Manny Piñol niingon nga si Lacson adunay all-out nga suporta. Siya miingon nga kini usa ka butang sa “prinsipyo” ug misaad nga dili molukso.
Sa istorya nga na-post sa Philippine News Agency (PNA), gipakita ang screenshot photo gikan sa Manny Piñol FB page diin suma ni Piñol, "Prinsipyo ang nakataya dito. Di ako sasama paglipat sa ibang grupo. Dito lang ako kay Ping Lacson! #52."
Pipila ka mga komento sa netizen misaludo ngadto sa kanhi Agriculture secretary.
Nagkadaiya man ang kolor sa politika, ang importante mahiusa kita alang sa kaayohan natong mga Filipino. Hinumdoman nato nga ang gitinguha natong tanan diha sa atong mga plataporma de gobyerno, mao ang kaayohan sa tanan, busa dili importante ang kolor, ang pinaka-importante mao ang, -- kung paunsa ka mituman sa mga saad, aron kapahimuslan sa katawhan.