KASONG pagsupak sa Commission on Elections (Comelec) Resolution 10728 ug Comprehensive Firearms and Ammunition Regulation Act, kun Republic Act 10591, ang atubangong kaso sa usa ka lalaki nga nasikop sa mga sakop sa Task Force Davao sa checkpoint sa Barangay Sirawan, Toril, Davao City pasado alas 11 sa gabii Marso 24, 2022.
Giila ni Captain John Louie Dema-ala ang nadakpan nga si Joselito Mabayao Jr., 39-anyos, taga Purok Rupenta 1, Daylusan, Magugpo East, Tagum City.
Nasayran nga sakay sa usa ka Toyota Vios pasulod sa Davao City si Mabayao, diin pag-abot niini sa inspection area, natahap ang mga TF-Davao personnels sa kadudahang butang hinungdan nga ila kining gipaklaro.
Usa ka .45 caliber pistola nga may usa ka magazine unod ang walo ka mga buhing bala.
Gilayong gikustodiya sa Toril Police Station ang suspek kinsa napasakan na og kaso didto sa korte.