Gumikan sa sagbot nga nagkatag, usa ka construction worker gitigbas ug gitarget sa sundang sa iyang silingan sa Sitio Tindahan, Barangay Can-sujan, dakbayan sa Carcar, alas 6:50 sa gabii, Huwebes, Marso 24.
Nalandig sa tambalanan si Reynaldo Larrobis, 29, ulitawo, construction worker, nagpuyo sa nahisgutang lugar, human nakaangkon og samad sa ulo ug buko-buko.
Ang suspek mao si Carlito Semilla Racoma, hingkod, minyo, caretaker, residente sa maong lugar.
Si Police Lt. Col. Ardioleto Cabagnot, hepe sa Carcar Police Station nga nahinabi sa Superbalita Cebu, nagkanayon nga si Racoma nasuko kang Larrobis ug sa pamilya niini.
Si Cabagnot niingon nga usa ka saksi nga si Lilian Lapiña, 26, dalaga, nibutyag nga pwerting sukoa ni Racoma gikan sa trabaho dihang nakita niya ang daghang mga sagbot nga nagkatag sa ilang dapit.
Nagyawyaw siya kay iyang gihagoan og tapok ang mga sagbot sayo sa buntag apan dihang niuli siya gikan sa trabaho, nagkatag na.
Walay igong basihanan, diretso niyang gibasol ang pamilya ni Larrobis.
“Nagtuo siya nga gituyo sa pagkatag sa pamilya sa biktima ang sagbot, duna naman gud ni silay wala pagsinabtanay,” dugang ni Cabagnot.
Nagdala og sundang, nidiretso siya sa pagduol kang Larrobis kay iyang tigbason apan ang biktima nga nakabantay, daling nitukmod kang Racoma.
Nisamot ang kalagot ni Racoma, iyang gitigbas sa ulo si Larrobis.
Bisan kon naigo na si Larrobis, nakadagan siya apan gigukod ni Racoma, gi-target sa sundang ug naigo sa buko-buko.
Hinuon, nadakpan sa kapulisan si Racoma, samtang si Larrobis luwas na sa makuyaw nga kahimtang.