GIHULAGWAY sa kapulisan nga notadong tulisan ug giingong hitman sa drug personalities sa dakbayan sa Sugbo gipusil-patay sa Huwebes sa gabii, Marso 24, samtang nag-inom kilid sa dalan sa Sityo San Jose, Barangay Lorega San Miguel, siyudad sa Sugbo.
Gipusil mao si Jemuel Flores, 20, kinsa daling gidala sa iyang mga kabanay sa ospital apan gideklarar nga dead-on-arrival.
Matud ni Police Major Albert Quilitorio, hepe sa Parian Police Station nga nahinabi sa Superbalita ug Sun Star Cebu, si Flores uban sa iyang mga higala, nag-inom sa nahisgutang dapit dihang usa ka lalaki nga giingong wa mailhi niduol sa grupo ug gipusil ang biktima.
Si Flores naigo sa iyang ulo ug dughan samtang nisibat og dali ang nag-inusarang mamumuno nga naglakaw lang.
Si Flores gisakay dayon sa taxi padulong sa ospital apan patay nang niabot.
Tulo ka mga kabhang sa bala sa kalibre .45 ang narekober sa Scene of the Crime Operations (Soco) personnel sa lugar nga nahitaboan.
Subay sa imbestigasyon sa kapulisan, nasuta nga si Flores maoy suspek sa pagpusil kang Renan Legaspi, 33, nga nagduwa og billiard sa Sitio Laguna sa samang barangay niadtong Pebrero 4, 2022.
Sumala pa, sila si Flores ug Legaspi dunay daang panagbangi. Ni-survive si Legaspi sa pagpamusil.
Dugang ni Quilitorio nga si Flores nalambigit sa mga kaso sa pagpanulis sa nagkalainlaing mga dapit sa Sugbo.
Sagad sa iyang mga biktima public utility jeepneys (PUJs).
Dugang ni Quilitorio nga si Flores, sumala sa mga impormasyon nga ilang nakuha, usa sa mga gun-for-hire sa drug personalities nga dunay ipapatay kon usa sa ilang mga sakop di makabayad sa drugas nga ilang gikuha.
GINANG, MEKANIKO
Duha ka mga tawo gipusil patay sa managlahing mga insidente sa pagpamusil sa dakbayan sa Sugbo sa kaadlawon sa Huwebes.
Unang biktima mao si Gene Beth Abayan Sabellano, alyas”Palalat,” 31, taga Sitio Bato, Brgy. Ermita, dakbayan sa Sugbo.
“Drug-related” ang unang gitan-aw nga motibo sa Carbon Police Station nga nag-imbestigar sa kaso.
Subay sa inisyal nga imbestigasyon ni police officer Angelito Bessano Valleser, si Sabellano napalgang patay sulod sa iyang lawak human madunggi ang mga buto sa pusil mga alas 4 sa kaadlawon sa Huwebes, Marso 24, 2022.
Adunay unom ka mga kabhang sa 9 mm pistol ug tulo ka mga deformed slug ang napalgan sa crime scene.
Si Valleser nitug-an nga ang iyaan ni Sabellano maoy nipahibawo kanila sa insidente.
Matod sa iyaan nga nakakita siya og duha ka wala mailhing mga lalaki nga ningsulod sa balay ni Sabellano ug nakadungog og kasaba nga maoy iyang gituohan nga mao na ang pagpamusil.
Dugang pa ni Valleser nga sumala sa kabanay sa mga biktima, si Sabellano giingong nakadawat og mga hulga nga patyon gikan sa wala mailhing mga tawo sa wala pa ang pagpamusil.
Si Valleser niingon nga si Sabellano nalambigit sa ilegal nga kalihokan, partikular sa ilegal nga drugas.
Sa laing bahin, “personal grudge” ang giingong nag-unang motibo sa ikaduhang pagpamusil sa Borromeo St., corner Climaco Street, sa Brgy. Pahina Central, Cebu City sa mga tungang gabii sa samang petsa.
Ang biktima giilang mao si Roel Ensalada, 31, residente sa Sitio Omega, Brgy. Pahina Central.
Ang nagpahibawo sa kapulisan mao ang live-in partner ni Ensalada. Usa ka nag-inusarang gunman ang namusil.
Adunay upat ka mga basiyo sa bala sa kalibre .45 sa dalan diin giingong gipusil si Ensalada.
Sa ilang nahipos nga impormasyon, si Ensalada nagtrabaho isip mekaniko ug giingong pipila sa iyang kanhi mga kustomer nangita kaniya tungod sa dili maayong kalidad niini nga serbisyo.
Kasamtangang anaa sa punerarya ang mga lawas ug gipaubos sa post mortem examination (PME) alang sa dugang imbestigasyon.