Katunga pa lang sa adlaw sa gilusad nga Simultaneous Anti Crime Law Enforcement Operation (SACLEO) sa Central Visayas sugod alas 12:01 sa kadlawon sa Sabado nga natapos sa alas 12:00 sa kaadlawon sa Dominggo, Marso 27, moabot na sa kapin sa P40 milyones nga balor sa drugas ang nasakmit sa kapulisan.
Labing dako nga nasakmit sa kapulisan ning nakalabay nga unang tulo ka buwan ning tuiga ang kapin sa lima ka kilo nga shabu gikan sa duha ka mga manag-agaw nga taga Barangay Ermita, Siyudad sa Sugbo.
Pasado alas 12:30 sa kaadlawon sa Sabado, gipahigayon ang buy-bust sa dan Panganiban, Barangay Pahina Central, Siyudad sa Sugbo sa City Drug Enforcement Unit (CDEU) sa Cebu City Police Office (CCPO).
Si Police Major Jonathan Beethoven Taneo, pangu sa CDEU ug nangu sa operasyon, ningsikop kanila ni Shelljay Centino Cuyno ug ig-agaw nga si Dennis Centino, pulos 24 anyos, nagpuyo sa dapit.
Matud ni Taneo nga ang ilang transaksiyon ni Cuyno 125 gramos ra, ug nag-uban ang mga manag-agaw paghatod.
“Nagtuo kining duha nga tinuod nga kasabot ang ilang gibaligyaan nga mga pulis diay kay nagdala man gud og uban pa nga mga item. Ako nagtuo nga kini ila na ning ipanghagbong unta pero maayo na lang nga napugngan nato,”matod ni Taneo sa Superbalita Cebu.
Moabot og 5,125 gramos o kapin sa lima ka kilo nga shabu ang nasakmit sa mga pulis gikan sa duha.
Balor kini og P34.8 milyones base sa street drug price (SDP).
Si Police Lieutenant Colonel Ryan Devaras, deputy director for administration sa CCPO, nisusi sa malampuson nga drug bust.
Matud ni Devaras nga mao kini ang labing dako nga nasakmit nga drugas niining sayo pa sa tuig.
Ilang subayon kon kinsay tag-iya sa kinilo nga shabu nga ipangsabwag sa Sugbo.
“Dako ni nga accomplishment kay kon na-dispose ni, daghan gyud ang maboang ani kon nabaligya ni,”matod ni Devaras
Dugang ni Devaras nga sa nakuha nga mga kasayuran sa CDEU gikan sa mag-agaw, usa ka nagngalan og Pastor Gonzales maoy ilang kasabot.
Ila pang subayon kon tinuod ba ang gisulti sa duha.
Si Cuyno niingon nga sa matag kilo nga ilang mahatod, duna siyay P10,000 nga suhol. Iya rang gikombinser si Centino sa pagkuyog.
Sa lain nga hugna sa drug-bust, ang Labangon Police Station gipangulohan ni Police Major Janelito Marquez nakasakmit usab og kapin sa tunga sa kilo nga shabu.
Ang nadakpan mao si Jaime Villahermosa, alyas Jimmy, 53, taga Sityo Laguna, Barangay Basak Pardo, Siyudad sa Sugbo.
Si Villahermosa nadakpan sa Pleasant Homes sa Barangay Punta Princesa.
Siya nakuhaan og 600 gramos sa gituohang shabu balor og P4 milyones base sa SDP.
Matod ni Marquez nga si Villahermosa kanhi napriso sa samang kaso sa Cebu City Jail apan ang iyang tig supply taga dakbayan sa Mandaue.
Alas 3:00 pasado sa kaadlawon, nasikop sa mga operatiba sa Regional Police Drug Enforcement Unit (RPDEU 7) sila si Sarsari Lakit Esnani, 44, ug iyang anak nga si Boyet Jamani, sa Sityo Puntod, Barangay Mambaling, Siyudad sa Sugbo.
Nakuhaan sila og shabu nga nitimbang og 40 gramos nga balor og dul-an P300,00.
Samtang sa dakbayan sa Talisay, tulo ka hugna sa buy-bust ang gilusad sa DEU-Talisay City Police Station.
Usa sa nasikop si Davisrise Granada Espinosa, 18 , taga Nazareth, Barangay Buhisan. Siya nasikop sa gawas sa Vista Grande, Barangay Bulacao.