Wala nay kinabuhi nga napalgan ang usa ka habalhabal driver, kinsa nakit-ang nagbuy-od sa kasagbutan sa alas 10:15 sa buntag sa Sabado, Marso 26, sa Brgy. Oriental Poblacion, lungsod sa Consolacion, amihanang Sugbo.
Ang nakaplagan giilang si Romeo Pareng, hingkod, minyo apan buwag sa asawa, taga Brgy. Tolotolo, lungsod sa Consolacion.
Si Police Staff Sgt. Arnold Rociana, sa Consolacion Police Station nga nahinabi sa Superbalita Cebu nagkanayon nga nakadawat sila og tawag sa telepono gikan sa nagpakabana nga residente.
Sa ilang pagresponde sa lugar, nagbuy-od si Pareng nga walay kinabuhi ug wa nay brief ug short pants.
Nailhan nila kini pinaagi sa iyang driver’s license nga taga dakbayan sa Danao.
Nagtuo sila nga giatake sa sakit sa kasingkasing si Pareng dihang motubag unta sa sugo sa lawas.
Ang igsuon niini nga ni-claim sa iyang lawas nibutyag nga may sakit nga hypertension ang biktima. Wala silay nakita nga timailhan nga gihilabtan si Pareng.
Ang kapulisan nagtuo nga posibling kaadlawon giatake si Pareng dihang nisum-ok sa libon aron pagtubag sa sugo sa lawas.