Human nikunhod ang kaso sa coronavirus ug gipaubos na sa level 1 ang nasod, hinayhinay na usab nga nigimok ang mga kalihukan kalabot sa natad sa paugnat sa kusog.
Sa Philippine Basketball Association, gitugotan na ang mga dumadapig nga linawas nga makatan-aw sa mga duwa. Wala na tong bubble-type tournament diin walay audience nga pasudlon.
Ang University Athletic Association of the Philippines (UAAP) nisugod na usab sa ilang mga sporting events kagahapon Sabado, Marso 26, 2022 diin ang basketball nga maoy sentro sa kompetisyon didto gipahigayon sa Mall of Asia.
Gawas sa basketball, aduna usay women’s volleyball, men’s beach volley, men’s 3x3 basketball, men’s and women’s chess, men’s and women‘s poomsae ug cheerdance.
Gihukman sa board nga pito lang una ka mga events ang ilang ipahigayon karong tuiga tungod sa kaapiki sa sitwasyon.
Wa usab magpabitin ang National Collegiate Athletic Association (NCAA) ug nisugod usab kini kagahapon. Sama sa UAAP ang basketball mao usab ang ilang gihatagan og prayoridad.
Tungod kay kining maong event mao may maingon nato nga gatasan o nagbuhi sa tibuok lega. Dinhi man mosulod ang mga dagkong sponsors ug aduna usay dakong kita sa gate.
Pero dinhi sa atoa, ang Cebu Schools Athletic Foundation, Inc. (Cesafi) mora man og nabali.
Sigon sa tinubdan nga atong nahagdaw, ang Cesafi mosugod sa sayong bahin sa Abril nga walay basketball ug volleyball events nga ipahigayon. Sagad niini mga individual events lang.
Ang rason kon nganong way basketball ug volleyball tungod kay wa diay gimentinar sa mga Cesafi schools ang ilang mga players.
Ilang gipangputlan sa scholarship ang ilang mga varsity players sa basketball ug volleyball niadtong panahon nga misiaw ang kaso sa coronavirus.
Posibling naapektohan ug maoy unang naigo sa cost cutting nga gihimo sa mga eskuwelahan kay nikunhod man ang ilang enrollees niadtong panahona.
Pero mora man og salikwaot kaayo paminawon. Way basketball pero dunay three-point shootout. Sa ato pa duna pa diay silay mga varsity players sa basketball nga gitipigan.
Kon mao ni, mas maayo pa siguro og i-substitute ang 3-ON-3 competition sa regular nga basketball tournament unya ang three-point shootout maoy usa sa mga highlights.
By tradition, kining three-point shootout di man ni siya regular event sa lega. Matawag lang kini siya nga lamas lang sa mga torneyo. Kinsa may motan-aw unya niini? Ug kinsa man sab nga mga kompaniya ang ganahan nga mo sponsor?
Kon wad-on ang basketball nga maoy bread and butter sa asosasyon, daw og sama ra unya nga gihinayhinay og patay ang lega.
Hinaot nga sama sa UAAP ug NCAA, ang Cesafi moseryuso usab sa ilang katuyoan ug dili nang lingawlingaw lang.
* * *
Ari ta sa NBA: Kon sa una, dako akong pagtuo nga makuha ra gihapon sa Los Angeles Lakers ang gituohan nga kalidad sa ilang dinuwaan, karon, sama sa uban, nagduda na hinuon ko kon makasulod ba kini sa playoffs.
Hapit na lang mahuman ang regular season, ang consistency sa Lakers mao ra gyud ang ilang pagka inconsistent.
Naay higayon nga nindot ang ilang dinuwaan, pero nagdaghan gyud ang makapasagmuyo nilang performance.
Sa kasamtangan, anaa sila sa ikanapulo nga puwesto sa Western Conference nga may 31-42 nga baraha ug siyam na lang sab ka duwa ang ilang duwa nga nahabilin sa dili pa matapos ang regular season.
Sunod nilang ikasangka ang New Orleans Pelicans nga anaa sa ikasiyam nga luna sa Western nga susama kanila og standing ug kinahanglan nga modaog sila aron makakuha sila og luna sa play-in.
Dili halayo nga nagsunod kanila ang San Antonio Spurs mga may 29-44 nga baraha sa ika-11 nga puwesto pero og magsigi gani og kapildi ang Lakers sa ilang uwahing siyam ka mga duwa, aw goodbye na lang playoffs.
Mao nga sugod sa Dominggo (Lunes dinhi sa Pilipinas) masentro ang mga mata ngadto sa Lakers kinsa napildi sa Philadelphi Sixers, 126-121, sa niaging adlaw nga wala makaduwa si LeBron James tungod kay aduna kini gamayng gipamati sa lawas.
Pero nakahatag og saktong kombati ang Lakers ning duwaa. (jun.migallen22@gmail.com)