Vallena: Kalingawan, friendship sa sikad

Sukad nagkagrabe ang kahimtang sa trapiko, nagkadaghan ang mga motorsiklo sa kadalanan. Dihang nagsugod pa ko sa pagbiseklita, kasagaran sa among kompetensya sa daplin mga nagbiseklita ra sab. Apan sugod sa 2013 hangtod karon, ang mga nagmotorsiklo mao nay hari sa daplin sa karsada sa paglusot sa bagang duot sa mga sakyanan.

Kon di ka mosayo og sikad gikan sa Talamban padung sa Busay, kalagmitan makigkompetensya ka sa mga motorsiklo, nga ang ubang drivers way batasan kay mobusina. Bisan tuod kon nagsakay kog two-wheeled nga dunay makina, di ko mangbusina sa mga nagbiseklita, gawas kon nagpataka na og tindak.

Usa sa mga rason nganong mas ganahan kong modiretso na lang sa Brgy. Guba ug Mabini kon mag bike ko, mao ang kahuot sa trapiko. Hasolan kong makigkompetensya sa mga motorsiklo sa paglusotlusot sa huot nga trapiko.

Kaanindot sakaan sa Brgy. Guba kay daghan kang mapilian nga mga tindahan nga mahimong kan-an sa pamahaw o kaha mag snacks ka lang. Usa lay wala sa Guba, kanang tandiay kinsay nindot og biseklita. Lahi kaniadto sa Busay nga magpasigarbo dayon sa mga upgrade.

Maluoy ko sa mga ordinaryo og biseklita kay mauwaw ang uban motipon og grupo. Di man gud kalikayan nga duna say mga hambogero sa ilang bike. Hangtod karon naa pa man gani. Masuko pang uban kon hikapon ang biseklita.

MALINGAW KA

Ang essence sa mountain biking di ang pagpanindotay sa biseklita. It is more on sharing the passion sa biseklita, pagtan-aw sa mga maanindot nga talan-awon nga di makita sa city center, maka exercise while nagsuroysuroy ug ang labing maanindot, pag build og friendship.

Apan sa akong naoserbahan sa taudtaud nakong sikad, dunay mga tawo nga gusto og exclusivity, kanang ang makakuyog lang sa grupo mao ang mahalon og bike ug sikat ang brand. Ubos ang ilang tan-aw sa uban nga baratuhon og biseklita.

Alang nako, di ang mahalon nga bike ang mo-matter, kon di ang nagsakay sa biseklita. Ang karakter sa nagsikad, di ang iyang gisakyan. Apan di malikayan, naay mga tawo nga unahon og tan-aw ang brand sa frame, dayon ang group set nga gigamit. Naa dayoy manaway.

PATAKAG TABI

Dunay ubang bikers nga wa mahibawo nga dunay mga cyclist nga ganahan sa old school nga design sa frame. Sagad naa ni sa road bikers. Usa ani akong higala nga si Dino Tabaña nga usa sa mga original sa Tindak Bisdak Cebu Folding Bike Society.

Naay ni comment sa iyang bike frame kay nagtuo siya nga tag P2,000 ra tawon ang biseklita sa akong higala. Wa siya masayod nga sikat kaayo nga Italian brand ang bike frame nga gitauran og mahalon sab nga parts. Sa mga di colllector, way ayo ang frame, labina kon wa makaila. Apan sa collectors sama sa akong higala, bulawan ang gisakyan. Ang collectors moapas sa presyo nga medyo taas na kaayo, labina kon limited edition.

Kon wa kay kasayuran, better maghilom. Ang importante di ang biseklita, kon di nalingaw ka.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph