Dili lang ang mga namaligya diha sa Carbon market ang gipatay niining kalaki sa Megawide ug sa Barug. Ang tibuok mercado ug dugang pang mga lote nga wa gipanag-iya sa Cebu City Hall sama ra sa gipatay karon.
Apan daghan ang wala makasabot. Ang nakasubo kay bisan mga sakop sa media ang nagdugang sa kalibog.
Kini mismong giingon nga modernisasyon sa Carbon. Alang sa pipila ka sakop sa media, ang proyekto sa Megawide mao ra gyud ang modernisasyon. Di sila makahuna-huna nga og modernisasyon nga walay labot ang Megawide.
Di sila makasabot, o magpagoryo-goryo lang gyud, nga dili modernisasyon sa Carbon ang gibuhat karon sa Megawide ug giduso sa liderato sa Barug diha sa Carbon. Dili sila makasabot sa terminong privatization kun paghimong usa ka pribadong merkado ang Carbon.
Nganong moingon man sab ako nga Barug? Kay mga sakop man lang usab sa Barug ang nagduso sa proyektong pagbaligya sa Carbon ngadto sa Megawide ug sa pagpatay sa maong public market.
Sa miaging tuig, naglaom pa ako nga lahi ang direksyon ni Bise Mayor Mike Rama. Kay gusto siyang matarong unta ang joint venture agreement tali sa Cebu City Hall ug sa Megawide Development Corporation.
Gani, iyang gibonggo mismo ang mga sakop sa Barug nga wala mobasa sa tibuok JVA dihang namirma kini. Ug niduso siya og resolusyon aron tahay matarong ang maong kasabutan.
Apan unsa bang pagka unsaa nga nausab man ang baruganan ni Mayor Rama. Daw uyon na man siya sa demolisyon diha sa Carbon kay kinahanglan kuno ipadayon ang proyekto.
Nganong nakaingon ko nga daw uyon ang mayor? Kay wa man gyud siya makabadlong kang Raquel Arce nga nagpanikad motabang sa Megawide. Wa gyud makamando si Mayor Rama kang Arce nga mohulat na lang. Total duha ka bulan na man lang ang hulaton.
Nganong di na man lang gyud sila makahulat maresolba ni Judge Soliver Peras ang grabi pagkalangay nga kasong gisang-at sa Carbon Alliance?
Niagi pa gani silag pangilad nga na-dismiss na kuno ang maong kaso hangtod nga nabonggo sila kay nagpatawag ang huwes og hearing. Dismiss sa ilang kagaral. Nisakay pa ang pipila ka mga sakop sa media kay maoy gisulti sa ilang mga tinubdan. Di intawon makamao mobasa og mga record sa kaso.
Nganong di na man lang sab gyud makahulat mahuman ang piliay sa Mayo 9 aron maklaro nato kon uyon ba gyud sa kalaki sa Barug ug sa Megawide ang tibuok Syudad sa Sugbo?
Marso 27 na gud karon. Duha ka bulan lang gyud ang hulaton aron makadesisyon ang mga Sugboanon. Nganong nahadlok man ang Barug ug ang Megawide nga mohulat niini?
Debate
Atong nasayran nga motambong si Talisay Mayor Samsam Gullas sa usa ka debate unta diha sa USC karong umaabot nga semana.
Ang nakaapan lang kay nibalibad si Konsehal Alan Bucao nga maoy iyang challenger. Alang kanako, dako ang nawala ni Bucao kay mao unta kini ang paagi nga mailhan siya nga takos batok kang Gullas.
Mao gud kiniy nahitabo ni Luke Espiritu. Wa jud ko makaila niya apan dihang nakakakita ko niya nga maoy nisupo nilang Harry Roque ug Larry Gadon, aw nakadesisyon ko nga mobotar kaniya.
Atong nasayran nga gitakda sab ang debate nilang Mayor Ahong Chan ug Rep. Paz Radaza, Mayor Jonas Cortes ug Kon. Olin Seno, ug kining si Naga Mayor Val Chiong ug iyang kaatbang nga wala ko makaila.
Apan ang angay atangan mao ang debate human sa Semana Santa.
Mao kini ang higayon nga mag-abot silang Mayor Mike Rama, Konsehal Dave Tumulak, ug Margot Osmeña.
Ang katapusan mao ang debate nilang Gob. Gwen Garcia ug kanhi tourism secretary Ace Durano. (DM nako sa @anol_cebu)