Ang Provincial Government sa Bohol nitugyan na sa cash aid ngadto sa 27 ka local government units (LGU) aron iapod-apod ngadto sa mga biktima sa bagyong Odette (Rai) nga nikuso-kuso sa Kabisay-an ug ubang mga dapit sa Mindanao niadtong Disyembre 16, 2021.
Sa opisyal nga pamahayag sa Lalawigan, mao kini ang 1st tranche sa Special Housing Assistance Program (SEHAP) gikan sa National Housing Authority (NHA).
Ang makadawat sa tag P5,000 matag benepisaryo mao kadtong hingpit o tipik nga nagub-an og mga balay.
Ang hingtungdang mga LGU mao na ang motakda kon kanus-a nila ipang-apod ang hinabang, mga tulo ka buwan kapin sukad sa pag-igo sa bagyo.
Matod sa samang pamahayag nga ang NHA nipasabot sa publiko nga una pa kining tranche sa hinabang.
Paigo lang kini sa 11,000 ka mga panimalay.
Naglaum ang NHA nga mapaspasan ang pagpagawas sa dugang mga pundo gikan sa Nasudnong Kagamhanan.