USA ka 30 anyos nga babaye nga kanhi masahista sa usa ka massage spa sa dakbayan sa Sugbo nadakpan sa Sityo Tugas, Barangay San Roque, dakbayan sa Talisay atol sa gilusad nga pagpangronda sa kapulisan, pasado alas 10:00 sa gabii sa Sabado, Marso 26.
Si Police Lieutenant Elwood Ebona, team leader sa City Drug Enforcement Unit (CDEU) sa Talisay City Police Station, maoy nangulo sa anti-illegal drug operation.
Ang pagpangronda malampuson sa pagsikop ni Eutoma Neri, 30, nagpuyo sa Sityo Banawa, Barangay Guadalupe, siyudad sa Sugbo.
Kauban ni Neri ang usa ka 17 anyos nga babaye nga si Linda (ngan gipugngan) nga giangkon ni Neri nga iyang higala apan dili tantong suod.
Ang dinakpan nasakmitan og shabu nga motimbang nga gibanabana sa 150 gramos nga mokantidad ngadto na sa usa ka milyon subay sa iyang street drug price.
Kaso nga kalapasan sa Republic Act 9165 ang atubangon sa dinakpan lakip na ang napagan nga menor de edad.
Ang operasyon batok sa gidiling gihungugan sa kapulisan nunot sa pagluag sa kwarentina ug namalik usab ang illegal nga negosyo.