PANGISDA ang sagad sa panginabuhian sa mga residente nga anaa daplin sa baybayon sa Island Garden City of Samal (Igacos) sa Davao del Norte, butang nga mas dugangan pa sa kasamtangan nga lokal nga panggamhanan sa maong isla ang programang pangkabuhayan ug ang pagpalambo sa turismo.
Atol sa proclamation rally sa Partido Demokratiko Pilipino–Lakas ng Bayan (PDP-Laban) sa Samal Island, gipaila-ila ni Samal Island Mayor Al David Uy ang iyang mga kaubanan sa linyada sa PDP-Samal.
Gibutyag ni Uy ang ilang mga kalinyada nga senador, diin giuna niini ang mga taga Mindanao ug kadtong dunay programa alang sa agrikultura.
Usa sa mga kalinyada nga senador sa PDP-Samal mao si kanhi Agriculture Secretary Emmanuel "Manny" Piñol, kinsa dunay gidala nga kampanya sa pagkawsa sa produksiyon sa pagkaon ug sa pagpalambo sa panguma ug uban pang paagi diha sa natad sa agrikultura.
Usa sa mga halandong bisita sa maong rally si Senador Christopher "Bong" Go nga mipasadya sa kagabhion sa mga Samalenyos pinaagi sa iyang pagdasig ngadto sa katawhan.
Sa ambush interview sa mga media ngadto kang Uy, gibutyag niini nga mas moalegre pa ang Samal Island sa pagpalambo sa hisgutanang turismo, ingon man ang pagpaabot nila sa katukuran sa Davao-Samal Bridge.
"Ang ginahulat nalang nato ang loan agreement with the China nga mapermahan," ingon ni Mayor Uy kinsa mipadayag sa iyang prayoridad sa ikatulo nga termino nga mao ang pagpalambo sa kuryente, sa patubig sa mga sityo ug sa mga kadalanan.
Giingon sab ni Uy nga ang mga beach resorts nga maigo sa pagtukod sa Davao-Samal Bridge dunay lakang nga mopasaka og kaso, butang nga mao karon ang ginabantayan sa lokal nga panggamhanan sa Igacos.