SI Eduardo Año, kalihim sa Department of the Interior and Local Government (DILG) subling nipasidaan sa mga opisyal nga dili mogamit sa mga kahimanan sa kagamhanan alang sa kalihokan sa pagpangampanya. Ang paggamit sa government-owned resources gidili sa balaod ug dunay katugbang nga multa o silot sa makalapas.

Sumala sa Local Government Code of the Philippines, Book III: Section 384. Role of the Barangay, “As the basic political unit, the Barangay serves as the primary planning and implementing unit of government policies, plans, programs, projects, and activities in the community, and as a forum wherein the collective views of the people may be expressed, crystallized and considered, and where disputes may be amicably settled.”

Apan nipahinumdom si Año sa kamandoan sa DILG nga ang barangay o mga opisyal sa barangay kinahanglan nga ‘apolitical’, walay partido nga dapigan sa kampanya ug adlaw sa botasyon. Gani, ang eleksiyon sa barangay gidili usab sa mga partido o lider sa pulitika nga manginlabot sa pagtahod sa pagka gawasnon sa labing ubos nga ang-ang sa kamada sa sosyodad.

Si Año nagkanayon nga “any semblance of campaigning,” lakip sa pagsul-ob og sinina nga nagpaila sa usa ka kandidato o partido sama sa kolor niini, kalapasan sa balaod. Sa inyong obserbasyon, matuman ba kini? Dayag nga daghang opisyal sa barangay ang nangampanya. Makita sa mga barangay hall nga nangombitay ang campaign materials sa mga kandidato, lakip sa party-list candidates.

Sa pagsugod sa campaign period alang sa local positions niadtong Biyernes, Marso 25, mas mibukal pag-ayo ang kawa sa pulitika. Ang pagka apoltical sa barangay sama sa walay bili. Magpakabuta-bungol lang ba ang Commission on Elections (Comelec) ug lokal nga sanga sa DILG?

Dili kini motagam kon walay sampol sa pagpatuman sa ngipon sa balaod.