Baldwin gimingaw sa Gilas players

WALA man tuod siya mohisgot sa posibleng dangatan sa iyang pagbiya sa national team program apan usa ang giklaro ni Tab Baldwin, gimingaw siya sa mga sakop sa Gilas Pilipinas.

Ang Samahang Basketbol ng Pilipinas (SBP) mianusyo niadtong Enero 31, 2022 nga mikanaog si Baldwin isip head coach sa Gilas Pilipinas aron makatutok kini sa iyang obligasyon sa Ateneo Blue Eagles.

Si coach Chot Reyes maoy gipuli kang Baldwin.

Sa labing una niyang komentaryo sa publiko gikan sa iyang pagbiya sa Gilas program, si Baldwin mipadayag sa iyang pagbati sa interbyu sa Power Play program.

“I miss those players. There’s always dreams and aspirations that you have as a coach, and even though I’m an old guy and I’ve been around for a long time, I had dreams and aspirations related to Gilas,” matod ni Baldwin nga napatik sa Spin.ph.

Nanghinaot si Baldwin nga makabenepisyo og dako ang Ateneo men’s basketball program sa iyang pagbiya sa Gilas.

“Certainly, even if I stayed with Gilas, I would have divided loyalties, divided attention,” pasabot ni Baldwin.