Espinoza: Kuyaw ang ‘The Arat na Cebu’ concert sa Covid-19

Espinoza: Kuyaw ang ‘The Arat na Cebu’ concert sa Covid-19

BASIN kon nahikalimot na ang kadaghanan nato, labi na dinhi sa dakbayan sa Sugbo, nga naa pa gihapon ang Covid-19 tungod kay naa pa man ta sa Alert Level 1. Kining Alert Level 1 wa ni magpasabot nga wala na ang Covid-19, nga maoy hinungdan sa daghan nangamatay gikan niadtong tuig 2020 hangtud karon.

Si Dr. Mary Jean Loreche, ang tigpamaba ug chief pathologist sa DOH-7, nakuyawan sa concerto niadtong Sabado diha sa City Sports Center nga iyang gitawag nga usa ka "super spreader event" nga mao unyay hinungdan sa pagbalik og saka sa mga maigo o matakdan sa Covid-19 tungod kay walay kasiguroan nga ang tanan nga nanambong, nga duolan sa 100, pulos bakunado ug husto ang ilang pagsul-ob sa face mask.

Dunay komedya nga akong nadunggan sa radio nga nag-ingon nga naghuot sa kadaghan sa tawo nga masimhot na ang ilok sa usag-usa ka tawo. Matud ni Konsehal Joel Garganera, deputy implementor sa EOC, nga 35,000 ra ang ticket nga libre ang ilang gipanghatag apan dunay daghan nga peke nga ticket. Sa ato pa, mas daghan ang peke nga ticket kay sa orihinal?

Bisan kon ang gisulti sa organizer sa "The Arat na Cebu" concert (ambot unsa kahay pasabot anang arat?), nga way labot ang pulitika ang maong kalihokan apan di kalikayan nga magduda ang kaatbang nilang Mayor Mike Rama ug Konsehal Raymond Garcia kay miatendir man sila, lakip na ang ilang linya nga mga kandidato, sa maong concerto. Si Rama kandidato pagka mayor ug si Garcia pagka bise mayor.

Uwahi na ang pamahayag sa pulis nga ilang sutaon kon ang mga mitambong sa maong concerto nagsul-ob ba og face mask. Natoral nga magsul-ob gyud ang mga motambong og face mask kay di man pasudlon kon di mag face mask. Apan sama sa mga malls, kon tua na gani sa sulod ang kadaghanan sa akong makit-an, ang ilang suwang na ang tauran sa face mask.

Sa kadaghan sa tawo (100) sa concerto niadtong Sabado, kinsa pa may mamadlong sa mga wala motarong og sul-ob sa ilang face mask. Sa hulagway sa concerto nga gipatik sa SunStar Cebu, di ko makatuo nga ingon ato kadaghan ang mga tawo, nga sa akong tan-aw moabot man to og 1,000.

Morag sayo ra kaayo nga magmaya ang katawhan sa paghinay sa Covid-19 tungod kay wala pa man gideklarar sa World Health Organization (WHO) nga libre na ta sa ani nga coronavirus, nga nagsugod niadtong Disyembre 2019 nga hangtud karon nia pa gihapon. Gani, bag-ohay lang, daghan ang naigo sa Covid-19 Omicron variant didto sa Hong Kong ug Singapore.

Atong mahinumduman nga ang kadaghanan sa mga naigo didto sa Hong Kong sa Omicron variant mao ang atong mga OFWs nga luoy ang ilang kahimtang kay ang ilang mga agawon gipasagdaan sila tungod kay di na sila pasudlon sa balay.

Angayan nga isilsil sa atong alimpatakan ang gisulti ni Dr. Loreche nga matag usa kanato magbaton na sa husto ug tinuoray nga responsabilidad labi na naa ning Covid-19.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph