NAKAKITA pa og laing pagsidlak sa adlaw ang NLEX Road Warriors human nila nabawsan ang Brgy. Ginebra Gin Kings, 86-85, sa Game 3 sa semi-finals series sa Philippine Basketball Association (PBA) Governor’s Cup niadtong Dominggo sa gabii, Marso 27, 2022 sa MOA Arena sa Pasay City.
Ang Road Warriors, nga ningkombati nga wala ang usa sa ilang mga sinaligan nga si JR Quinahan unya naangol pa si Matt Nieto sa 3rd quarter, nakalikay nga mabutlogan ug napahakan nila ang labaw sa Gin Kings sa best-of-five nga kombati, 2-1.
“Sa unang dalawang laro, we took the lead early, then we lost it as we couldn’t sustain the momentum,” matod ni NLEX coach Yeng Guiao human sa duwa nga napatik sa www.pba.ph.
“Today, sabi ko lang let’s avoid the embarrassment of getting sweep. Kung makaisa, hindi na nakakahiya; at baka maiba ang complexion ng series. They proved we can beat Ginebra.”
Ang kadaugan gipangulohan ni import Cameron Clark pinaagi sa iyang 21 puntos ug 17 rebounds, nidugang og 15 puntos si Kevin Alas samtang niamot og 13 puntos si Justine Chua.
Ang Gin Kings gipangulohan sab sa ilang import nga Justine Brownlee pinaagi sa iyang 27 puntos, nitunol og 16 puntos si Christian Standhardinger samtang nitunol og 13 puntos si Scottie Thompson.
Sa laing duwa, giusban pagbuntog sa Meralco Bolts ang No. 1 team Magnolia Ang Pambansang Manok Hotshots, 101-95, aron pagposte og 2-1 nga bintaha sa kaugalingon nilang semis series.
Kini maoy ikaduhang sunodsunod nga kadaugan sa Bolts human sila nabunyagan og pilde sa series.